Հայաստանի տեխնիկումների և քոլեջների ուսանողները նոր մասնագիտություններ են յուրացնում
ՎԵՐԼՈՒԾՈՒԹՅՈՒՆՆԵՐ
Mir24.tv-ն գրում է, որ Հայաստանի քոլեջների և դպրոցների ուսանողները տիրապետում են ապագայի մասնագիտություններին՝ արևային մարտկոցների օպերատոր, էլեկտրական մեքենաների մեխանիկ, կաթիլային ոռոգման համակարգեր տեղադրող։ Այժմ այդ մասնագիտությունները ամենապահանջվածն են երկրում։ МИР 24-ի թղթակից Արմեն Օսիպյանցը պարզել է, թե ինչպես են ընթանում պարապմունքները:
Ուսանողների համար արևային մարտկոց հավաքելը լեգո հավաքելուց ավելի դժվար չէ: Նրանք նաև գիտեն, թե ինչպես վերանորոգել և պահպանել ֆոտովոլտային մարտկոցները և ջրատաքացուցիչները: «Ուսանողները քրտնաջան սովորում են: Արդեն մի քանի նման կայաններ են տեղադրել մեր քոլեջի շենքի, տեղի հեռուստաընկերության, մի քանի առանձնատների տանիքների վրա»,- ասել է Սևանի վարժարանի արդյունաբերական ուսուցման վարպետ Դավիթ Մինասյանը։
Սևանի վարժարանը ունի 30 աշակերտ։ Նրանք երեք տարի կսովորեն անվճար և կստանան վերականգնվող էներգիայի կայանների մասնագետի մասնագիտություն։ «Սովորելը հետաքրքիր է, քանի որ հիմնականում գործնական պարապմունքներ ենք անցկացնում։ Համոզված եմ, որ ավարտելուց հետո իմ մասնագիտությամբ աշխատանք կգտնեմ»,- ասել է ուսանող Անդրանիկ Մարգարյանը։
«Ֆրանսիա-Ռուսաստան-ԱՊՀ էներգետիկ ասոցիացիայի հետ համագործակցության արդյունքում ստացանք արևային մարտկոցներ և ուսուցիչներ ուղարկեցինք Ֆրանսիա՝ վերապատրաստման։ Մենք պայմանագրեր ենք կնքել նաև այլընտրանքային էներգետիկայի ոլորտի ընկերությունների հետ, որոնց համաձայն մեր ուսանողները պրակտիկա են անցնում։ Լավագույնները կընդունվեն աշխատանքի»,- ասել է Սևանի վարժարանի տնօրեն Գեղամ Խաչատրյանը։
Իսկ Հայաստանի պոլիտեխնիկական համալսարանի քոլեջում դասավանդում են այն ամենը, ինչ կապված է էլեկտրական մեքենաների հետ։ Շրջանավարտները կպահպանեն և կվերանորոգեն «կանաչ» տրանսպորտը: «Էլեկտրական մեքենայի առավելություններից կնշեմ էկոլոգիապես մաքուր լինելը, հարմարավետ վարելը, այն ավելի քիչ թանկ մեքենա է»,- ասել է Հայաստանի ազգային պոլիտեխնիկական համալսարանի քոլեջի ուսանող Վահրամ Քարամյանը։
ԵԱՏՄ-ում «կանաչ» տրանսպորտի մասսայականացմանը ուշադրություն է դարձվում պետական մակարդակով՝ էլեկտրական մեքենաների ներմուծումն ազատված է մաքսատուրքից։ Կա նաև Եվրասիական տնտեսական հանձնաժողովի փաստաթուղթ, այն ուղղված է տաքսի ընկերություններում, ավտոշեյրինգ ծառայություններում և պետական կառույցներում էլեկտրամոբիլների քանակի ավելացմանը։ «Մենք միջազգային համագործակցություն ենք հաստատում, հիմա բանակցում ենք Բելառուսի ներկայացուցիչների հետ երկու նոր կրթական լաբորատորիաներ ստեղծելու համար։ Նախատեսում ենք նաև ավտոկայանատեղիում տեղադրել էլեկտրական լիցքավորման մի քանի կայաններ, որտեղ մեր ուսանողները կկատարելագործվեն»,- ասել է Հայաստանի ազգային պոլիտեխնիկական համալսարանի քոլեջի տնօրեն Րաֆֆի Քարամյանը։
Ուսումնական ծրագրերը մշակվել են կրթության, գիտության, մշակույթի և սպորտի նախարարության կողմից։ Բաժինը աշխատում է պետական այլ մասնագիտացված կառույցների և գործատուների հետ համատեղ։
«Ծրագիրն արդեն իրականացվել է 15 ուսումնական հաստատություններում, որտեղ մոտ 200 մարդ վերապատրաստվում է այսօր արդիական մասնագիտություններով։ Ուսուցումն անցկացվում է ութ ոլորտներում, օրինակ՝ լոգիստիկայի, կաթիլային ոռոգման, բուսաբուծության, էլեկտրական մեքենաների վերանորոգման մասնագետներ»,- ասել է ԿԳՆ մասնագիտական կրթության և ուսուցման վարչության պետ Կարեն Մանուկյանը։
Վերջերս կրթական ծրագրում ընդգրկվել են ևս երկու նոր մասնագիտություն՝ կահույքագործներ և ամբարձիչների օպերատորներ: Հաջորդ տարի Հայաստանի քոլեջներում և դպրոցներում կներդրվեն շինարարական տարբեր մասնագիտությունների գծով վերապատրաստման ծրագրեր։
Նյութը հրապարակման պատրաստեց Կամո Խաչիկյանը
