Փաշինյանի նվնվոցին Բիշքեկում ուշադրություն չդարձրին

Ղրղզստանի մայրաքաղաք Բիշքեկում երեկ հավաքվել էին ԵԱՏՄ անդամ պետությունների ղեկավարները՝ քննարկելու տնտեսական և քաղաքական կարևորագույն հարցերը։ ՌԴ նախագահ Վլադիմիր Պուտինն էլ մասնակցել է նիստին, ապա և մեկ առանձնազրույց ունեցել, միայն Նիկոլ Փաշինյանի հետ։ Հանդիպման սկզբում Փաշինյանը դժգոհել է տարածաշրջանում ստեղծված իրավիճակից, նշել, որ այն շարունակում է լարված մնալ, գլխավոր խնդիրը Լեռնային Ղարաբաղն է։

Փաշինյանը հայտարարել է, թե ուզում է Կրեմլի ղեկավարի հետ քննարկել տեղում ստեղծված իրավիճակը։ Խոսելով վերջին զարգացումների, մասնավորապես, Լաչինի միջանցքը փակելու ադրբեջանական փորձերի մասին՝ Նիկոլ Փաշինյանն ընդգծել է՝ դեպքերը ծավալվում են ռուս խաղաղապահների պատասխանատվության գոտում:

Ռուսաստանի նախագահը, ի դեպ, հանդիպման դռնբաց հատվածում բառ անգամ չի ասել Լեռնային Ղարաբաղի խնդրի մասին, փոխարենը հիշատակել է առկա տնտեսական հնարավորությունները, Հայաստանում ՌԴ ներդրումներն ու փոխադարձ առևտրատնտեսական շփումները։ Իսկ բուն առանձնազրույցի մասին ոչ պաշտոնական Կրեմլը, ոչ Հայաստանի վարչախետի աշխատակազմը բառ անգամ չեն գրել, ինչը վկայում է, որ այդ քննարկումներն առանձնապես Նիկոլ Փաշինյանի սրտով չեն եղել։

ԵԱՏՄ ղեկավարների նիստում էլ Փաշինյանը սահմանափակվել է միայն գազի և տնտեսական այլ հարցերի մասին ճամարտակելով։ Ըստ էության, Փաշինյանին կամ չի հաջողվել որևէ առարկայական, իր շահերից բխող ձևակերպում քաղել Պուտինի շուրթերից, կամ էլ ՌԴ նախագահի խոսքերը չի համարձակվել փոխանցել հանրությանը։ Երկու դեպքում էլ գործ ունենք մի իրավիճակի հետ, երբ Հայաստանի գործող վարչախումբը վաղուց կորցրել է իր ազդեցության վերջին փշուները ռուսական իսթեբլիշմենթի վրա, մնացել միայն Կրեմլի արհամարհական վերաբերմունքի հույսին։

Հայաստանի 30-ամյա անկախության շրջանում երբևէ չի եղել նման իրավիճակ, երբ մեր պետությունն այսքան չարքաշ ու խեղճացած իրավիճակում լինի։ Միակ պատասխանատուն և մեղավորը, իհարկե փաշինյանական վարչախումբն է:

Նանե Ասատրյան