«Ես այլևս տուն չեմ վերադառնա». ադրբեջանական բանտում գտնվող հայազգի Մարատ Գալուստյանի մտերիմները կարծում են, նրա վրա ճնշում է գործադրվում
ԻՐԱՎՈՒՆՔ
Ադրբեջանական բանտում գտնվող հայազգի Մարատ Ուելդանով-Գալուստյանը զանգահարել է իր քրոջը՝ Մարիաննա Միրզոյանին և խնդրել անձամբ իրեն այլևս նամակ չգրել։ Հետո խնդրել է իր ողջույնները փոխանցել ծնողներին և ասել, որ ինքն այլևս իրենց մոտ չի վերադառնա:
Tert.am-ի հետ զրույցում այս մասին պատմեց Մարատ Ուելդանով - Գալուստյանի մոտ ընկերը՝ Ելենա Մակարենկոն և փոխանցեց հեռախոսազրույցի ձայնագրությունը, որտեղ ակնհայտ էր՝ իր խոսքերից հետո Ադրբեջանի բանտում պահվող Գալուստյանը լաց է լինում:
«Ես խոսել եմ Մարատի փաստաբանի հետ, ով ադրբեջանցի է: Նա հայտնեց, որ հանդիպել է Մարատի հետ, խոսել է գործի քննության մասին: Նա ասաց, որ Մարատը ստանում է բժշկական օգնություն, ոչ մի անհանգստացնող բան իր պաշտպանյալի վարքագծում չի տեսել, իրականում դժվար իրավիճակ է ստեղծվել, որի պատճառով ինքը տանջվում է: Նրա նկատմամբ կիրառվող ֆիզիկական բռնությամբ ճնշման վարկածը բացառում էր: Բոլոր հնարավոր միջոցները, ըստ փաստաբանի, որին կարող էր դիմել Ադրբեջանում ՌԴ դեսպանությունը, կիրառվում են, սպասում է հերթական տեսակցության մասին որոշմանը»,-պատմեց Ելենա Մակարենկոն:
Նա զարմանք հայտնեց այս խնդրում իր երկրի արտաքին գործերի գերատեսչության պահվածքի վերաբերյալ. այստեղ հակված են հավատալու անվճար փաստաբանական օգնություն ցուցաբերող ադրբեջանցի փաստաբանի խոսքերին:
«Նա մեզ անընդհատ խաբում է: Մարատը մեզ հետ Կարմիր խաչի միջոցով կապվելիս հաղորդել է, որ փաստաբանն իրեն չի էլ այցելում: Նրան վաղուց չի տեսել»,- պատմեց Ելենա Մակարենկոն:
Հիշեցնենք, որ Մարատ Ուելդանով-Գալուստյանին նախորդ տարի հունիսի 9-ից ձերբակալել և անազատության մեջ են պահում Բաքվում՝ թմրանյութերի, հոգեմետ միջոցների անօրինական պատրաստման, արտադրության, ձեռքբերման, իրացման, պահման և տարածման մեղադրանքներով: Սակայն նրա մտերիմներն ու գործընկերները ժխտում են ադրբեջանական վարկածը՝ համարելով, որ մեղադրանքներն անհիմն են: Ավելին՝ պատմում են, որ հարցաքննության ժամանակ Մարատ Ուելդանովին նրա ազգության մասին էին հարցնում:
Հիշեցնենք նաև, որ Մարատ Ուելդանովը Ադրբեջանում մեկ տարուց ավելի աշխատել է ավստրիական «Do&Co» ընկերությունում, որը զբաղվում է հյուրանոցային բիզնեսով: Քանի որ նրա անձնագրում նշված էր ոչ թե իր հայկական ազգանունը, այլ՝ կնոջ, Բաքվում երբեք չի հայտնվել ուշադրության կենտրոնում: Մարատը 1990-ականներից Ռուսաստան էր տեղափոխվել Բաքվից՝ իր ընտանիքի հետ:
Մարատ Ուելդանովի գործի հետ կապված հունիսին ձերբակալել էին նաև նրա գործընկերուհուն՝ Ելենա Մակարենկոյին, ով 15 օր անազատության մեջ է մնացել Բաքվում:
Ելենա Մակարենկոն Tert.am-ին պատմեց, որ իր գործի հետ կապված էլ ինքը պարբերաբար դիմել է Ռուսաստանի արտաքին գործերի նախարարությանը: ՌԴ քաղաքացին իր երկրի արտաքին գերատեսչությունից պարզաբանում է խնդրել, թե ինչու իր շահերը չեն պաշտպանել Բաքվում, երբ նա ձերբակալված էր: Երեկ, ըստ Ելենա Մակարենկոյի, ՌԴ ԱԳՆ-ից պատասխանել են, որ իրենք պաշտպանում են իրենց քաղաքացիների շահերը ՌԴ հյուպատոսության իրավասությունների սահմանում, նրանք իրավունք չունեն միջամտելու գործի քննությանը:
Մարատ Ուելդանով-Գալուստյանը վերջին հեռախոսազրույցում քրոջից՝ Մարիաննա Միրզոյանից խնդրել էր, որ նա դիմի Ադրբեջանի գլխավոր դատախազությանը: Նա նշել է, որ ցանկանում է, որ իր գործին ընթացք տրվի:
«Ես այլևս քեզ չեմ զանգի: Մինչև քննիչն ինձ հանցագործ չդարձնի, նա չի հանգստանա: Ես ցանկանում եմ, որ դու այլևս ինձ ոչ մեկի միջոցով ոչինչ չուղարկես, դու այլևս եղբայր չունես: Մայրիկին և հայրիկին ջերմ բարևներ փոխանցիր: Ես այլևս տուն չեմ վերադառնա»,- ասել է նա, նաև նշել, որ ինքը կալանավայրում «լավ ձեռքերում է», իր առողջությանն էլ վտանգ չի սպառնում:
«Իսկապես Մարատն էր զանգել, դա նրա ձայնն էր: Բայց նրա վարքագիծը շատ տարօրինակ էր: Նա իսկապես շատ է հոգնել, նրան այնտեղ ծաղրում են, և դրա համար է ցանկանում, որ գործին ընթացք տրվի: Ես գիտեմ, թե Մարատն ինչպիսին էր և հիմա ինչպիսին է դարձել: Մարատը հուսալքված է,- ասաց Ելենա Մակարեկոն,-մեզ այն ժամանակ մեկ ասում էին, թե հայ լրտեսներ ենք, հետո՝ մենք դարձանք ռուս լրտեսներ, այնուհետ՝ կրկին հայ լրտեսներ: Հետո երբ հասկացան, որ այդ մեղադրանքներն անհիմն են, նրան մեղադրեցին թմրանյութերի վաճառքի մեջ»:
Ելենա Մակարենկոյի խոսքով՝ Ադրբեջանում մի բան են ցանկանում իր գործընկերոջից, որ նա ընդունի իր դեմ առաջադրված մեղադրանքները:
«Նա չի ընդունում դրանք, իր դեմ առաջադրած մեղադրանքների տակ չի ստորագրում, նրանք էլ չեն կարողանում ապացուցել իրենց մեղադրանքները, իսկ մինչև ապրիլի 9-ը նրանք պետք է վճիռ կայացնեն: Դրա համար, կարծում եմ, որ նրանք ինչ-որ զզվելի միջոց են գտել նրա վրա ազդելու: Ես հիմա հուսահատված եմ, որովհետև մտածում եմ, որ Մարատին վտանգ է սպառնում,- նշեց Ելենա Մակարենկոն՝ հավելելով,-նա շատ է սիրում իր ծնողներին, երբ գրում էր նրանց, ասում էր՝ ես կապրեմ ցանկացած իրավիճակում, ամեն ինչ կանեմ, որ նորից հանդիպեմ ձեզ»:
Ելենա Մակարենկոն նշեց, որ ինքն անձամբ է նման իրավիճակում հայտնվել. «Գիտեմ, որ այնտեղ չկան մարդիկ, որ ասեն՝ վերցրու հեռախոսը և զանգիր հարազատներիդ: Նրանք ինչ-որ բան են ծրագրել: Կարծում եմ՝ այդպես են արել, որպեսզի եթե հետո Մարատը ինքնասպանություն գործի, ապացույց ունենան, որ նա գտնվել է դեպրեսիվ վիճակում, որ նա ցանկանում էր ինքնասպանություն գործել»:
Իր գործընկերոջը սպասվողի մասին Ելենա Մակարենկոն մի քանի վարկածներ ևս ունի: «Իմ սուբյեկտիվ կարծիքն է, որն ինձ համար ցանկալի է․ Մարատին կմեղադրեն ցանկացած հոդվածով, հետո կվերադարձնեն Ռուսաստան՝ իր հայրենիք: Այստեղ մեզ ավելի հեշտ կլինի դռներ թակել, զանգել: Կարևորը Ադրբեջանի ճանկերից նրան ազատելն է: Մյուս տարբերակն այն է, որ նրանք կգտնեն հարյուրավոր միջոցներ՝ Մարատին ազատ չարձակելու համար»,- ասաց նա:
Ելենա Մակարենկոն, նշեց, որ ինքը բոլոր լրատվամիջոցների և իր երկրի պետական կառույցների ուշադրությունն է ցանկանում հրավիրել խնդրի վրա, նրա խոսքով՝ պատրաստվում է ևս մեկ անգամ գնալ Ռուսաստանի արտաքին գործերի նախարարություն:
«Ես ցանկանում եմ, որ Մարատի մասին տեղեկատվությունը տարածվի, ցանկանում եմ, որ մարդիկ իմանան, որ Ադրբեջան գնալ չի կարելի: Դա այնքան սոսկալի է: Մարդկանց պետք է զգուշացնել, որ եթե նրանք ունեն հայի արյուն, անգամ եթե այդ մասին չգիտեն էլ, Բաքվում լինելու դեպքում կարող են հայտնվել բանտում»,- ասաց նա:
