Վարչապետի նախկին ընկերոջ գրառումը․ որտե՞ղ է իրական Նիկոլը
ՎԵՐԼՈՒԾՈՒԹՅՈՒՆՆԵՐ
Վարչապետի պաշտոնը զբաղեցնող Նիկոլ Փաշինյանի երբեմնի ընկերները, թերևս, ամենածանրն են տանում նրա այսօրվա դեգրադացիան, բարոյական անկումն ու ապիկարությունը։
«Ժողովրդավարական հայրենիք» կուսակցության նախագահ, Նիկոլ Փաշինյանի նախկին գործընկեր Պետրոս Մակեյանն է ուշագրավ գրառում արել, այն վերնագրել «Վարչապետի կողմից պահանջված մարդու տեսակը»։ Ըստ Մակեյանի, «Քաղաքացիական պայմանագիրը», որպես իշխող կուսակցություն, շարունակում է մնալ հանրության տեսադաշտում, «մասնավորապես՝ ՔՊ համաժողովում վարչության ընտրությունների կեղծմամբ և նախօրեին Նիկոլի կողմից կուսակցության փոխնախագահների նշանակմամբ։ Նիկոլը, անտեսելով ՔՊ-ի հնաբնակներին, փոխնախագահներ նախընտրեց ՀՀԿ-ական ու ԲՀԿ-ական ջահելներին, իսկ ավելի վաղ «Լուսավոր Հայաստանի» երբեմնի անդամին նշանակեց ԱԺ ՔՊ խմբակցության ղեկավար»։
«Վարչապետի աղետաբեր կադրային քաղաքականության առանցքի հիմնական արժեհամակարգն է՝ անսկզբունքայնությունը, ճամբարափոխությունը, հանցակցությունը և կենդանական բնազդով հավատարմությունը։ Վերոշարադրված սկզբունքով է ձևավորվում պետական կառավարման համակարգը, տեղական ինքնակառավարման մարմինները»,- նշել է Մակեյանը և հավելել, թե Մնացական Մարտիրոսյանին հակակոռուպցիոն դատավոր նշանակմամբ այդ գործընթացը սկսվեց նաև դատական համակարգում։
Մակեյանն ուշագրավ բացահայտում է արել նաև ՔՊ կուսակցության աշխատակազմի ղեկավար Արուսյակ Մանավազյանի մասին, ընդգծել, թե այդ պաշտոնին նրա նշանակումը նույն սկզբունքով է։ Ըստ Մակեյանի, Մանավազյանը, լինելով «Հայկական Ժամանակ» թերթի հաշվապահը, միաժամանակ թերթը հրապարակող «Դարեսկիզբ« ՍՊԸ-ի տնօրեն, 2016թ-ից իրեն որևէ տեղեկություն չի տրամադրել, և ապօրինաբար տնօրինել են իր շահաբաժինը։
Մակեյանը տարիներ շարունակ եղել է «Հայկական ժամանակի» փայատերերից մեկը, և արձանագրում է, որ Փաշինյանը գցել է իրեն։ «Երբեմնի ընդդիմադի գործիչ Նիկոլի համար ամենաանընդունելին վերոշարադրված որակները կրող մարդիկ էին՝ իր ձևակերպմամբ մարդու փչացած տեսակը։ Հարց՝ որտե՞ղ է իրական Նիկոլը, վարչապետ Նիկոլ Փաշինյա՞նն՝ իր փչացած կադրային համակարգով, թե՞ ընդդիմադիր Նիկոլը, որն անհանդուրժող էր մարդկային այդ տեսակների նկատմամբ»,- գրում է Մակեյանը։
Աննա Նադոյան
