Նիկոլ Փաշինյանն այլևս չի վստահում իր կուսակցության հին անդամներին
ՎԵՐԼՈՒԾՈՒԹՅՈՒՆՆԵՐ
Նիկոլ Փաշինյանն այլևս չի վստահում իր կուսակցության հին անդամներին, որոնք փորձում են ավելի ակտիվ դիրքեր գրավել կուսակցության վարչությունում և սասանել սեփական կուսակցության առաջնորդի դիրքերը։
Նախօրեին «Քաղաքացիական պայմանագիր» կուսակցության՝ կեղծիքներով ընտրված վարչությունը նիստ է գումարել, որը վարել էՆիկոլ Փաշինյանը։ Նախատեսված էր, որ վարչության նիստում քննարկելու են կուսակցության վարչության փոխնախագահների, ինչպես նաև կուսակցական այլ պաշտոնյաների հարցը։
Ընդ որում նախատեսվում էր, որ վարչության փոխնախագահների պաշտոնին կնշանակվեն Ազգային ժողովի փոխնախագահ Ռուբեն Ռուբինյանը՝ զարգացման և կապերի գծով, և պաշտպանության նախարար Սուրեն Պապիկյանը՝ տարածքային կազմակերպությունների համակարգման գծով։
Մեր աղբյուրի փոխանցմամբ, սակայն, նիստը սկսելուց կարճ ժամանակ անց Նիկոլ Փաշինյանն անակնկալի է բերել վարչության 14 անդամներին՝ հայտարարելով, որ այդ պաշտոնների համար առաջարկում է Վահագն Ալեքսանյանի և Գևորգ Պապոյանի թեկնածությունը։
ԲՀԿ-ական անցյալ ունեցող Ալեքսանյանին՝ զարգացման և կապերի գծով, իսկ Գևորգ Պապոյանին տարածքային կազմակերպությունների համակարգման գծով տեղակալ առաջարկելու այս որոշումը սառը ցնցուղ է եղել վարչության անդամների համար, սակայն նրանք որևէ մեկը չի հակառակվել Նիկոլ Փաշինյանի կամքին, թեև դրանից հետո կասկած են հայտնել, որ Փաշինյանն այլևս չի վստահում բոլոր այն նախկին անձանց, որոնց հետ 2015 թվականին ստեղծել է «Քաղաքացիական պայմանագիր» կուսակցությունը և եկել իշխանության։
Օբյեկտիվորեն Փաշինյանն իհարկե չպետք է վստահեր նախկին կուսակցականներին, վերջիններս հեղափոխությունից հետո գործազուրկի կամ էժան աշխատուժի կարգավիճակը փոխարինել են նախարարների, պատգամավորների և այլ պաշտոնյաների աշխատանքի հետ, զգալի հավակնություններ դրսևորել, փոխել իրենց կենսակերպը և այժմ նույնիսկ հավակնում են, անհրաժեշտության պահին գցել սեփական առաջնորդին՝ սեփական կաշին փրկելու համար։
Մինչդեռ, մեր աղբյուրի պնդմամբ՝ Փաշինյանն օրինակ հայտարարել է, թե Պապոյանն ու Ալեքսանյանը առավել լավ են իրականացնում իր քարոզչությունը և շատ ավելի նվիրված են իրեն՝ Փաշինյանին, քան իր հնամյա որևէ կուսակցական։
Ի դեպ, ՔՊ աշխատակազմի ղեկավար է նշանակվել պատգամավոր Արուսյակ Մանավազյանը։ Վերջինս երկար տարիներ եղել է Նիկոլ Փաշինյանի խմբագրած թերթի տնօրենը և Փաշինյանի ամենամերձավոր անձանցից մեկն է։
Ինչևէ, այս նշանակումները հերթական անգամ վկայում են իշխող ուժում առկա լուրջ խնդիրների ու գզվռտոցի մասին։
Մարուսյա Վարդանյան
