Հայաստանի իրանամետ քվեարկությունը․ երբ պրագմատիզմը գերիշխում է

ՄԱԿ-ի մարդու իրավունքների խորհուրդը նախօրեին, 35-րդ հատուկ նիստի ժամանակ որոշում է կայացրել ստեղծելու նոր փաստահավաք առաքելություն, որը կհետաքննի Իրանում մարդու իրավունքների խախտումները ՝ կապված այդ երկրում սեպտեմբերի 16-ին մեկնարկած և մինչ օրս շարունակվող բողոքի ակցիաների հետ։

Քվեարկությանը 47 երկրներից մասնակցել է 31-ը, որոնցից կողմ են քվեարկել 25-ը, դեմ՝ 6-ը, ընդ որում դեմ քվեարկող երկրների թվում են Հայաստանը, Չինաստանը, Կուբան, Պակիստանը և Վենեսուելան։ Միջազգային կառույցներում վերջին շրջանում Հայաստանը գրեթե սինխրոն էր քվեարկում արևմտյան երկրների հետկամ առնվազն ձեռնպահ էր մնում, կամ, երբ հարցը վերաբերում էր իր ռազմավարական դաշնակից Ռուսաստանին։

Տարօրինակ կերպով այս անգամ Հայաստանը բոլորովին հակառակ քվեարկությունն է արել, քան արևմտյան երկրները և նրանց սատելիտները՝ աջակցելով Իրանի Իսլամական Հանրապետությանը։

Այս քվեարկությունից հետո Հայաստանի արտգործնախարարությունը լուրջ քննադատության տակ է հայտնվել և Հայաստանի «ժողովրդավարական» իշխանություններին մեղադրում են Իրանում հակաժողովրդավարական դրսևորումներին աջակցելու մեջ։

Մինչդեռ հարկ է նշել, որ Հայաստանի իշխանությունների այս քվեարկությունը բացարձակ պրագմատիկ և իրատեսական է՝ հաշվի առնելով, որ Հարավային Կովկասի տարածաշրջանում Իրանը մնացել է Հայաստանի եզակի աջակից երկրներից մեկը, և Իրանի Իսլամական Հանրապետությունը բնականաբար ուշադիր հետևում է բոլոր երկրների քվեարկություններին, համապատասխան եզրակացություններ անում և ըստ այդմ դասավորում իր քաղաքական կուրսը։ Այս առումով Հայաստանի իշխանություններին քննադատելու որևէ իմաստ գոյություն չունի։

Ըստ էության նրանք եզակի դեպքերից մեկն են, որ իրատեսական և ճիշտ քվեարկություն են իրականացրել։ Ավելին, այս քվեարկության դեպքում նույնիսկ կարող են Արևմուտքին բացատրել, թե ինչո՞ւ են այսպես քվեարկել՝ հաշվի առնելով, որ Արևմուտքը հստակ պատկերացնում է Հայաստանի տեղը տարածաշրջանում, ստեղծված քաղաքական իրողությունները և նույնպիսի խանդով չի վերաբերվում Իրանի հետ Հայաստանի հարաբերություններին, որքան այլ երկրների դեմ։

Մանե Մսրյան