ՀԱՊԿ գագաթնաժողովից հետո Ադրբեջանը կտրուկ կոշտացրել է խոսույթը

Երևանում կայացած ՀԱՊԿ գագաթնաժողովից և Հայաստանի համար դրա արդյունքների ձախողումից հետո Ադրբեջանը երեկ լիովին տրվել է ռազմատենչ հռետորաբանությանը։

Ադրբեջանի պետական անվտանգության ծառայության փոխտնօրեն Ջեյհուն Շատլինսկին հայտարարել է, թե Հայաստանի ռևանշիստական ուժերը, Հայաստանի ռազմականացումը և իր ֆինանսական հնարավորությունները գերազանցող սպառազինության ձեռքբերումը խոչընդոտում են Բաքվի և Երևանի միջև հարաբերությունների կարգավորմանը։

Ելույթ ունենալով ուժային կառույցի կազմակերպած համաժողովին ՝ Շատլինսկին պնդել է, թե Հայաստանի իշխանությունները ձգտում են հնարավոր բոլոր միջոցներով ձգել հայ-ադրբեջանական խաղաղության պայմանագրի ստորագրումը։ Ադրբեջանի պետական անվտանգության ծառայության ղեկավարի տեղակալը նաև հայտարարել է, թե Բաքուն փաստեր ունի ռուս խաղաղապահների տեղակայման տարածքներ զենքի փոխադրման, ինչպես նաև ռազմական սադրանքների համար պայմանների ստեղծման մասին։

Շատլինսկին մանրամասներ չի ներկայացրել, սակայն թեման ավելի ճոխացրել է արտգործնախարար Ջեյհուն Բայրամովը՝ հայտարարելով, թե Հայաստանը Լաչինի միջանցքն օգտագործում է Ղարաբաղ սպառազինություն ուղարկելու նպատակով, ինչը հակասում է նախկինում ձեռք բերված պայմանավորվածություններին։

«Միջանցքի ոչ նպատակային օգտագործմանը պետք է վերջ դրվի, Ադրբեջանը այս ուղղությամբ համապատասխան քայլերի կդիմի»,- սպառնացել է Բայրամովը՝ նշելով, որ 2021 թվականին Ղարաբաղում տեղադրված ականները այնտեղ են հասցվել հենց Լաչինի միջանցքով։

«Հայաստանը խախտում է եռակողմ հայտարարության հիմնարար սկզբունքները և չի կատարում Ադրբեջանի տարածքից բոլոր հայկական զինված կազմավորումների դուրս բերման պարտավորությունը»,- ասել է Ադրբեջանի արտգործնախարարը։

Վստահաբար սա նշանակում է, որ Ադրբեջանն ինքն էր սադրանքի համար համապատասխան հող ստեղծում և միջազգային հանրության աչքին թոզ փչում, ռազմական նոր էսկալացիայի համար, առավել ևս, որ Հայաստանի «դաշնակիցները» ՀԱՊԿ-ում ավելի շատ Ադրբեջանի ընկերներն են, քան Հայաստանի։ ՀՀ հատուկ հանձնարարություններով դեսպան Էդմոն Մարուքյանն է գրել, թե Ադրբեջանի պնդումը, որ Հայաստանը Լաչինի միջանցքն օգտագործել է իրենց տարածք ցամաքային ականներ տեղափոխելու համար բացարձակ սուտ է։

Եվ ավելին, հենց ադրբեջանցիներն էլ Հայաստանի օկուպացված տարածքներից վերցրել ականները, տեղափոխել Ադրբեջանի կողմից վերահսկվող տարածք, միջազգային գործընկերներին ցույց տալու և Լաչինի միջանցքը վիճարկելու կեղծ հիմքեր ստեղծելու համար։ Չստանալով Զանգեզուրի միջանցքը՝ Ադրբեջանն այժմ ամեն ինչ անում է, 2020 թվականի նոյեմբերի 9-ի հայտարարության մեջ ամրագրված Լաչինի միջանցքը փակելով, Արցախի ազգաբնակչությանը հերթկան ցեղասպանության առջև կանգնեցնելու, ահաբեկելու և իրենց տարածքից դուրս մղելու համար։

Իսկ Հայաստանի իշխանությունները շարունակում են նվնվալ և որևէ քայլ չեն ձեռնարկում արցախցիների անվտանգության ապահովվման ուղղությամբ։ 

Կարեն Ավագյան