Փաշինյանը աջակցում է Էրդողանի ներքաղաքական խաղերին

2023 թվականի հունիսի 18-ին Թուրքիայում կայանալու են հաջորդ նախագահական և խորհրդարանական ընտրությունները։ Այս փաստը գրեթե խելագարության է հասցնում գործող նախագահ Ռեջեփ Թայիբ Էրդողանին, որը, բոլոր վերջին սոցիոլոգիական հարցումների համաձայն, զգալիորեն զիջում է իր մրցակիցներին, այդ թվում՝ «Ժողովրդա-հանրապետական կուսակցության նախագահ Քեմալ Քըլըչդալօղլուին, Ստամբուլի քաղաքապետին և մյուս հնարավոր բոլոր թեկնածուներին։

Զիջում է նաև Թուրքիայի իշխող դաշինքը։ Ընդդիմադիր 6 միավորներ մտադիր են միավորվել, որպեսզի կարողանան տապալել Էրդողանին, և վերջինիս տնտեսական ծանր իրավիճակի, սեփական ռեյտինգի անկման պայմաններում չի մնում այլ բան, քան դիմել հին և «արդյունավետ» միջոցի, այն է ռազմական բախումներ հրահրել առնվազն հարևանների հետ։

Տևական ժամանակ թուրքական իշխանությունները փորձում էին խնդիրներ հարուցել իրենց մեկ այլ հարևանի՝ Հունաստանի համար։ Սակայն Եվրոպայի կողմից կոշտ նախազգուշացման, ինչպես նաև ԱՄՆ-ի կողմից Հունաստանին ժամանակակից զենքեր տրամադրելու ֆոնին՝ Էրդողանը թերևս զսպել է իր ախորժակը Հունաստանի վրա հարձակվելու հարցում, և այժմ այլ ուղղություններ է որոնում։ Հիմնական հնարավոր տարբերակները Սիրիան է, Իրանը կամ էլ Հայաստանը, ընդ որում, եթե Իրանի դեպքում իրավիճակը չափազանց անկանխատեսելի է, իրանական զինված ուժերն ու քաղաքական համակարգը լուրջ ուժ ունեն կոշտ պատասխան հասցնելու Թուրքիային, ապա Սիրիայի և Հայաստանի դեպքում բավականին Թուրքիայի իշխանությունների գործը հեշտացել է։

Դա է պատճառը, որ հարաբերությունների կարգավորման մասին տևական դրական արձանագրումներից հետո, օրեր առաջ Էրդողանը հենց ինքը, Հայաստանին կրկին մեղադրանքներ է հասցեագրել, նշել, թե Հայաստանի կողմից դրական ազդակներ չեն տեսնում հայ-ադրբեջանական և հայ-թուրքական հարաբերությունների կարգավորման ուղղությամբ։

Նորանոր պահանջներ դնելով Հայաստանի դեմ՝ նաև մեղադրանքներ հարուցելով հայկական Սփյուռքին, թե՛ Ֆրանսիայում, թե՛ Միացյալ Նահանգներում, Էրդողանը թերևս հիմքեր է փորձում ստեղծել նոր ռազմական էսկալացիայի սկսման համար։ Բնավ տարօրինակ չէ, որ այս պայմաններում Հայաստանի գործող իշխանությունները՝ Նիկոլ Փաշինյանի գլխավորությամբ, ոչ թե փորձում են կանխել հնարավոր վտանգներն ու ողբերգական զարգացումները, այլ ընդհակառակը մի բան էլ կողմ են Էրդողանին։

Վարչապետ Նիկոլ Փաշինյանը օրեր առաջ Հանրային հեռուստաընկերության տված հարցազրույցում դրական է գնահատել Էրդողանի հետ ունեցած հեռախոսազրույցն ու Պրահայի հանդիպումը, նշել, թե իր և Էրդողանի շատ մոտեցումներ համընկնում են, թե որ մոտեցումներն են համընկնում, Փաշինյանն առանձնապես չի մեկնաբանել։ Ըստ էության, սակայն, այս ամենը գալիս է հանգելու նրանում, որ փաշինյանական վարչախմբին հանձնարարվել է ամեն գնով օգնել Թուրքիայի գործող իշխանություններին վերընտրության հարցում։ Փաշինյանը թերևս այդպես կարծում է, թե կկարողանա Հայաստանի Հանրապետության տարածքի ու քաղաքացիների կյանքի հաշվին արժանանալ Էրդողանի բարեհաճությանը։

Արման Ստեփանյան