Ռուբեն Վարդանյանը պետնախարար կնշանակվի. մեր տեղեկությունը հաստատվեց

1or.am-ն օրեր առաջ հայտնել էր, թե Արցախ տեղափոխված ռուսաստանցի գործարար Ռուբեն Վարդանյանը շուտափույթ կնշանակվի Արցախի պետնախարարի պաշտոնում։ Հայտնել էինք, որ Արցախի մեր աղբյուրների փոխանցմամբ, արդեն վերջնականապես որոշում է կայացվել, Վարդանյանն էլ համաձայնվել է աշխատել Արցախի գործադիրի և քաղաքական կուսակցությունների հետ։

Մեր տեղեկությունը հաստատվեց, Ռուբեն Վարդանյանն ինքը երեկ ֆեյսբուքյան գրառում է արել, հայտնել, թե նոյեմբերի սկզբին պաշտոնապես կստանձնի Արցախի պետական նախարարի պաշտոնը և այդ ժամանակ կներկայացնի մեր ռազմավարական նպատակները, լուծման ենթակա առաջնահերթ խնդիրները, ինչպես նաև կտեղեկացնի ձեռնարկվելիք առաջին քայլերի մասին։

«Հայաստանի ու Արցախի շուրջ ծավալվող քաղաքական զարգացումները, Արցախի խնդրի լուծման շուրջ սրվող իրավիճակը, որից, առանց չափազանցության, կախված են և՛ Հայաստանի, և՛ Հայկական աշխարհի ճակատագրերը, ինձ չափազանց մտահոգում են: Ես գիտակցում եմ, որ այլևս երկար մտածելու ժամանակ չկա, և այս իրավիճակում այլ ճանապարհ չունեմ, քան արցախցիների կողքին գտնվելն ու Արցախի ապագայի նկատմամբ իմ բաժին պատասխանատվությունն ստանձնելը»,- գրել է Վարդանյանն ու հավելել. «Մեկուկես ամսվա ընթացքում Արցախի քաղաքական ու հասարակական գործիչների, տարբեր շրջանների և սոցիալական տարբեր խմբերի ներկայացուցիչների հետ հանդիպումներն ու շփումներն ինձ համոզեցին, որ մարդիկ աջակցում են Արցախի Հանրապետության պետական նախարարի պաշտոնում իմ թեկնածությանը և հանձինս ինձ ուզում են տեսնել պատասխանատու առաջնորդի, որն իր շուրջը կհամախմբի բոլոր առողջ ուժերին և կղեկավարի երկիրը ճգնաժամից հանելու իրական աշխատանքները»։

Ասպրամ Մարալչյան