Փաշինյանին ու Ալիևին հոկտեմբերի վերջին կնստեցնեն մեկ սեղանի շուրջ

Ռուսաստանի նախագահ Վլադիմիր Պուտինը Աստանայում կայացած գագաթնաժողովին՝ Հայաստանի վարչապետ Նիկոլ Փաշինյանին և Ադրբեջանի նախագահ Իլհամ Ալիևին հրավիրել էր հանդիպում անցկացնել Ռուսաստանում։ Ընդ որում նշել էր, որ դա կարող էր լինել ցանկացած քաղաք՝ Սոչի, Մոսկվա, Սանկտ Պետերբուրգ, ցանկացած տեղ, ցանկացած ժամանակ։

«Ես հաճույքով հրավիրում են և՛ Ադրբեջանի ղեկավարին և՛ Հայաստանի վարչապետին, դուք կարող եք պայմանավորվել ժամկետի շուրջ և ինչպես ես հասկացա, այժմ հետաքրքրություն կա հանդիպելու Ռուսաստանում», - ասել էր նա ԱՊՀ գագաթնաժողովում։

Թեև հանրային միջոցառմանը Պուտինը դիվանագիտական բառապաշարով էր ձևակերպել իր հրավերը, բայց մեր աղբյուրների փոխանցմամբ՝ թե՛ Հայաստանի վարչապետի, թե՛ Ադրբեջանի նախագահի լուրջ ճնշում կա, և հանդիպումը ամենայն հավանականությամբ կկայանա հոկտեմբերի 30-ին կամ 31-ին։

Ըստ էության, երկուսին էլ ստիպել են ժամկետների հստակեցում անել և որոշվել է հանդիպումը կազմակերպել հոկտեմբերի վերջին։ Առայժմ հստակ չէ , թե ռուսական որ քաղաքում է կայանալու այդ հանդիպումը, սակայն, մեր աղբյուրների փոխանցմամբ, ամենայն հավանականությամբ, այն տեղի կունենա Պետերբուրգում։ Փաշինյանն ինքն է մերձավոր շրջապատին հայտնել, թե այլևս անհնար է դիմադրել Ռուսաստանի ճնշումներին։

Հատկապես իր արևմտամետ խաղերի պայմաններում, ինչպես նաև արևմտյան տարբեր պատվիրակությունների Հայաստան այցի պայմաններում, Ռուսաստանը մտադիր է իր ձեռքը վերցնել նախաձեռնությունը և պարտադրել «Խաղաղության պայմանագիր» կնքել, կարգավորել հարաբերությունները բացառապես ռուսական հովանավորությամբ։ Իզուր չէ, որ հենց Աստանայի հանդիպումից հետո Նիկոլ Փաշինյանը տվիթերում Իլհամ Ալիևին կոչ արեց սահմանագծման և սահմանազատման հանձնաժողովների նիստ գումարել Բրյուսելում։

Ըստ էության, դա էլ Բրյուսելի պատասխանն էր, որ Նիկոլ Փաշինյանի բերանով փորձում է պարտադրել Ադրբեջանին նախաձեռնությունը կրկին փոխանցել արևմուտքին։ Ալիևը սակայն այդ կուտը չկերավ, և Աստանայում լուրջ ռեվերանսներ արեց Ռուսաստանին։ Առաջիկա օրերին կհայտարարվի, թե կոնկրետ ո՞ր օրը և որտե՞ղ է կայանալու այդ հանդիպումը՝ Ռուսաստանի, Ադրբեջանի և Հայաստանի մասնակցությամբ։

Աննա Նադոյան