Միրզոյանի տարօրինակ հանդիպումը Նյու Յորքում
ՎԵՐԼՈՒԾՈՒԹՅՈՒՆՆԵՐ
ՀԱՊԿ դեմ և հակառուսական տրամադրությունների գեներացման առումով Հայաստանի գործող իշխանությունները բավական լուրջ արդյունքներ են գրանցել։ Չհաշված Հայաստանում իշխանական մամուլով և նրա սպասարկուներով հակառուսական տրամադրությունների ավելացումը, երեկ ուշագրավ մի իրադարձություն է տեղի ունեցել Նյու Յորքում, որը թերևս լիովին տեղավորվում է այդ ծիրում։
Արտգործնախարար Արարատ Միրզոյանը մի շարք հանդիպումներ է ունեցել ՄԱԿ ԳԱ 77-րդ նստաշրջանի շրջանակներում։ Ամենաուշագրավ հանդիպումը թերևս Կոսովոյի փոխվարչապետ, արտաքին գործերի նախարար Դոնիկա Գյորվալա-Շվարցի հետ կայացած հանդիպումն է։
Արտգործնախարարը զրուցակցին է ներկայացրել Հայաստանի ինքնիշխան տարածքի դեմ Ադրբեջանի վերջին ագրեսիայի հետևանքները և Ադրբեջանի կողմից միջազգային հումանիտար իրավունքի կոպիտ խախտումները։ Դոնիկա Գյորվալա-Շվարցը անդրադարձել է Արևմտյան բալկաններում ստեղծված իրավիճակին Սերբիայի հետ քաղաքական խնդիրների պատճառով։ Այս հանդիպումն ուշագրավ է այնքանով, որ Հայաստանի Հանրապետությունը մինչ այս պահը չի ճանաչել Կոսովոյի անկախությունը։ Այդ տարածքի անկախության ջատագովները՝ Միացյալ Նահանգներն ու եվրոպական երկրներն են։
Ռուսաստանը, մինչդեռ, աջակցում է Սերբիային, իսկ Ռուսաստանի դաշնակիցների մտքով մինչ օրս չէր անցել որևէ կերպ շփումներ ունենալ Կոսովոյի իշխանությունների հետ։
Հայաստանը մինչ օրս միայն խաղաղապահ առաքելություններ է ուղարկում Կոսովո, որտեղ հայ խաղաղապահները ապահովում են հասարակական կարգը։ Եվ այսօր, երբ ԱՄՆ-ն և իր դաշնակիցները փորձում են օգտվել Ռուսաստանի թուլացումից Ուկրաինայում և Հարավային Կովկասում, և պարտադրել Սերբիային և այլ երկրների ճանաչել Կոսովոն, թերևս Հայաստանի արտգործնախարարի այս հանդիպումը կարող էր լուրջ հետևանքներ ունենալ։
Իհարկե, Հայաստանի գործող վարչախումբը հստակ գիտակցում է իր քաղաքական քայլերի հետևանքները, ամենայն հավանականությամբ արտգործնախարարն իր այս հանդիպումը իրականացրել է հենց այն կողմի պարտադրանքով Նյու Յորքում։ Ռուսական կողմն առայժմ չի մեկնաբանել արտգործնախարար Արարատ Միրզոյանի այս քայլը։
Դավիթ Քոչարյան
