Քաղաքագետը բացատրել է Երևանի և Բաքվի միջև հակամարտության սրումը
ՔԱՂԱՔԱԿԱՆՈՒԹՅՈՒՆ
Vz.ru-ն գրում է, որ «Բաքուն փորձարկում է տարածաշրջանում իր դիրքերն ամրապնդելու հնարավորությունը, ինչպես նաև ուսումնասիրում է Երևանի ու Մոսկվայի արձագանքը, որպեսզի փորձի առաջ մղել իր շահերը և իր օգտին լուծել հարևանի հետ հակամարտությունը։ Միևնույն ժամանակ, չպետք է ակնկալել ներկայիս սրացման ռազմական լուծում, կողմերը կրկին կդիմեն դիվանագիտությանը»,- «Vz.ru»-ին ասել է Ռուսաստանի միջազգային գործերի խորհրդի գլխավոր տնօրեն, քաղաքագետ Անդրեյ Կորտունովը` մեկնաբանելով Ադրբեջանի և Հայաստանի միջև հակամարտության սրումը։
«Այն իրավիճակում, որն այսօր ստեղծվել է Ադրբեջանի և Հայաստանի սահմանին, չէր կարելի բացառել, որ վաղ թե ուշ սրացում տեղի կունենա։ Կողմերի դիրքորոշումները խիստ տարբերվում են, և մինչ այժմ հնարավոր չի եղել իրավիճակը կարգավորել որևէ կերպ։ Բաքվի և Երևանի միջև հակասությունների մեծ մասը չեն լուծվել խորհրդային ժամանակներից,- ասել է զրուցակիցը,- օրինակ, սահմանների սահմանազատումը հիմնված է հին խորհրդային քարտեզների վրա։ Այստեղ կողմերից յուրաքանչյուրն ունի իր նարատիվը, որը հարիր չէ հակամարտության մյուս կողմին։ Բացի այդ, հնարավոր չէ համաձայնության գալ Լեռնային Ղարաբաղի հարցում։ Եթե այդ հարցն իրականում արդեն փակված է Ադրբեջանի համար, ապա Հայաստանը պնդում է տարածքի հատուկ կարգավիճակը և նույնիսկ նրա բնակիչների ինքնորոշումը, ինչպես նաև եռանդով փորձում է պահպանել այնտեղի հայ համայնքը»։
«Ադրբեջանը, ըստ երևույթին, հաշվի առնելով արտաքին իրավիճակը, փորձարկում է իր դիրքերն ամրապնդելու հնարավորությունները, և այդ պատճառով բարդ մարտահրավերներ են առաջանում ռուս խաղաղապահների համար։ Բայց հազիվ թե որևէ մեկը ցանկանա կռվել Ռուսաստանի հետ։ Դժվար է պատկերացնել ուղիղ բախումներ մեր խաղաղապահների և ադրբեջանական բանակի միջև։ Դա պետք չէ ո՛չ Մոսկվային, ո՛չ Բաքվին։ Կարծում եմ ամեն ինչ նորից կհանգեցնի դիվանագիտական, եթե ոչ վերջնական, ապա գոնե ժամանակավոր լուծումներ գտնելու փորձերին։ Ըստ ամենայնի, այս փուլում Ռուսաստանը կձգտի պահպանել ստատուս քվոն»,- պարզաբանել է քաղաքագետը,- ռուս խաղաղապահների մանդատը տրվել է հինգ տարով, այժմ ավարտվում է միայն երկրորդ տարին։ Դեռ ժամանակ կա։ Ռուսաստանը չի շտապի իրավիճակի քաղաքական կարգավորման հետ կապված նոր նախաձեռնություններով հանդես գալ, քանի որ դա շատ բարդ խնդիր է, և, հնարավոր է, իրավիճակը դեռ լիովին հասունացած չէ դրա համար»։
«Սահմանային միջադեպերը եղել են և կշարունակվեն, բայց դժվար թե դրանք վերաճեն այն մակարդակի հակամարտությունների, որոնք մենք տեսել ենք նախորդ տարվա աշնանը։ Իհարկե, Ադրբեջանը վճռական է իր շահերն առաջ տանելու և իր խնդիրները լուծելու հարցում, բայց ամեն ինչ կախված է նրանից, թե նա որքան հեռու է պատրաստ գնալ: Իր հերթին, այս հարցի պատասխանը կախված է Ռուսաստանի դիրքորոշումից և նրանից, թե որքան կոշտ կամ հակառակը ռուս խաղաղապահները կմոտենան տարածաշրջանում ծագող խնդիրների լուծմանը։ Հասկանալի է, որ Ադրբեջանն իր գործողություններով փորձարկում է ոչ միայն Հայաստանին, այլ նաև Ռուսաստանին։ Եվ Ռուսաստանի պատասխանն է, որ կորոշի այն սահմանները, որոնց շրջանակներում Բաքուն կկարողանա գործել»,- եզրափակել է Կորտունովը:
Նյութը հրապարակման պատրաստեց Կամո Խաչիկյանը
