Ռուսաստանը փորձում է դիվանագիտական ճանապարհով հասնել խաղաղության, բայց հիմա դա անելը հեշտ չէ, քանի որ Բաքվի թիկունքում կանգնած է Թուրքիան. Զատուլին
ՔԱՂԱՔԱԿԱՆՈՒԹՅՈՒՆ
Ռուսաստանը փորձում է դիվանագիտական ճանապարհով խաղաղության հասնել Ադրբեջանի և Հայաստանի միջև: Հիմա դա անելը հեշտ չէ, քանի որ Բաքվի թիկունքում կանգնած է Թուրքիան։
Այս մասին «Գովորիտ Մոսկվա» ռադիոկայանին տված հարցազրույցում ասել է Պետդումայի ԱՊՀ հարցերով կոմիտեի նախագահի առաջին տեղակալ Կոնստանտին Զատուլինը։
Զատուլինը կարծում է, որ Ադրբեջանն օգտվում է Ուկրաինայում հատուկ ռազմական գործողությանը Ռուսաստանի մասնակցությունից և նոր «վերջնագիր» է ներկայացնում Հայաստանին։
Ըստ քաղաքական գործչի՝ 2020-ի 44-օրյա պատերազմից հետո Ադրբեջանը կիրառում է բոլոր ճանապարհներն ու միջոցները՝ Ղարաբաղի համար պայքարում Հայաստանի պարտությունից հնարավորինս շատ օգուտներ քաղելու համար։ Զատուլինի խոսքով՝ Ադրբեջանն օգտագործում է ուկրաինական իրադարձությունների մեջ ներքաշված Ռուսաստանի սուղ հանգամանքները՝ իր պահանջները ներկայացնելու համար, որոնք շատ նման են վերջնագրի։
Պատգամավորն ասել է, որ Ռուսաստանը հեռու կմնա ռազմական գործողություններին միջամտելուց, բայց պետք է «հանգստացնի» Ադրբեջանին։
«Խաղաղապահ ուժերն արդեն իսկ ուժի կիրառում են. Ղարաբաղի տարածքում արդեն կան խաղաղապահներ: Կարծում եմ, որ Ռուսաստանն ամեն ինչ կանի, որպեսզի խուսափի մի իրավիճակից, որին անհրաժեշտ է ուղղակի միջամտություն և ինչ-որ ռազմական գործողություններ սկսել։ Ռուսաստանը պարզապես պետք է հանգիստ պահվածք ստանա Ադրբեջանից: Բայց այն պայմաններում, երբ Թուրքիան կանգնած է Ադրբեջանի թիկունքում, դրան դժվար է հասնել։ Ռուսաստանը դիվանագիտական ճանապարհով փորձում է առաջընթաց գրանցել խաղաղության պայմանագրի ուղղությամբ», - ասել է Զատուլինը։
