Քծնել ու քննադատել միաժամանակ․ Փաշինյանի երեսպաշտությունը
ՎԵՐԼՈՒԾՈՒԹՅՈՒՆՆԵՐ
Դեռևս օգոստոսի սկզբին Արցախում ադրբեջանական սադրանքի հետևանքով 2 զոհ և մոտ երկու տասնյակ վիրավոր տալուց հետո, Նիկոլ Փաշինյանը կառավարության նիստում խստորեն քննադատել էր ռուս խաղաղապահների գործողությունները։
Անդրադառնալով Խծաբերդ և Հին թաղեր գյուղերի գրավմանը և հայ զինծառայողների գերեվարմանը, մարտին Լեռնային Ղարաբաղի Փառուխ գյուղի գրավմանը՝ կրկին խաղաղապահների ներկայությամբ, Նիկոլ Փաշինյանն անդրադարձել էր, թե շփման գծի երկայնքով հրադադարի ռեժիմի շարունակական և ահագնացող խախտումները, Լեռնային Ղարաբաղի հայության խաղաղապահների ներկայությամբ ֆիզիկապես և հոգեբանորեն ահաբեկելու դեպքերը պարզապես անընդունելի են։
«Այս համատեքստում խիստ անհրաժեշտ է դառնում Լեռնային Ղարաբաղում խաղաղապահ օպերացիայի մանրամասների ճշգրտումը»։
Փաշինյանն ավելի հեռու էր գնացել՝ հայտարարելով, թե Լեռնային Ղարաբաղի շփման գծի անվտանգությունը եռակողմ հայ-ռուս-ադրբեջանական ձևաչափով չի ապահովում, հարկավոր է մտածել միջազգային մեխանիզմների գործարկման մասին, թե ի՞նչ միջազգային մեխանիզմներ Նիկոլ Փաշինյանն այդպես էլ չէր հստակեցրել։ Օրեր առաջ Վլադիվաստոկում արդեն Վլադիմիր Պուտինի հետ հանդիպմանը Նիկոլ Փաշինյանը ջանք չէր խնայում գովասանքի խոսքեր հղել ոչ միայն Պուտինին, այլ նաև Արցախում տեղակայված ռուս խաղաղապահներին։
«Մենք շատ բարձր ենք գնահատում Ռուսաստանի խաղաղապահների գործունեությունը Լեռնային Ղարաբաղում, Լաչինի միջանցքում, և ես կարծում եմ, որ դա շատ կարևոր է ընդգծել։ Ընդհանրապես Լեռնային Ղարաբաղում անվտանգության ապահովման իմաստով կան նրբություններ, որոնք մենք մշտապես քննարկում ենք և կարծում եմ այսօր էլ շատ տեղին կլինի այդ հարցերը քննարկել»,- նշել է Փաշինյանը։
Նա սակայն չի մանրամասնում արդյո՞ք որևէ կերպ փորձել է ճշգրտել Արցախում խաղաղապահ օպերացիայի մանրամասները Վլադիմիր Պուտինի հետ, թե բավարարվել է միայն քծնանքի դոզայով։ Ամեն պարագայում Նիկոլ Փաշինյանի արածը պարզ երեսպաշտություն է, որը նույնիսկ քաղաքական խուսանավում անվանել հնարավոր չէ։
Մի դեպքում արևմտյան տերերին հաճոյանալու համար նա քննադատում է ռուս խաղաղապահներին, իսկ մյուս դեպքում արդեն Ռուսաստանի նախագահի առջև ծնկում և գովում խաղաղապահներին, իսկ իրականությունը գտնվում է այս երկուսի մեջտեղում, որ եթե նույնիսկ խնդիրներ էլ կան, ապա պետք է այդ ամենը քննարկել ռուս գործընկերների հետ և մշտական պարզաբանումներ ստանալ, որպեսզի հնարավոր լինի ապահովել Արցախի բնակչության անվտանգությունը։
Էդգար Գաբրիելյան
