Հայկ Մարությանը՝ վարչախմբի թիրախում
ՎԵՐԼՈՒԾՈՒԹՅՈՒՆՆԵՐ
Երևանի նախկին քաղաքապետ Հայկ Մարությանի սենսացիոն տեսանյութից և «Քաղաքապետը» անվանումով ներկայացման անոնսից հետո, ակնհայտ էր, որ գործող իշխանություններն ամեն ինչ անելու են նրա դեմն առնելու համար։
Մամուլում տեղեկություններ են շրջանառվում, թե Հայկ Մարությանը պատրաստվում է այդ մոնո ներկայացման ժամանակ օգտագործել Նիկոլ Փաշինյանի իրեն ուղղված ձայնային հաղորդագրությունները, որոնք բավականին լուրջ սկանդալային բացահայտումներ կարող են լինել։ Հայկ Մարությանի հայտարարությունից հետո գրեթե տասնյակ ներկայացումների տոմսեր հաշված ժամերի ընթացքում վաճառվեցին։
Փաշինյանական իշխանությունն, իհարկե, ամեն ինչ անելու է նրա ներկայացումը կանխելու, իսկ Հայկ Մարությանին հնարավորության դեպքում մեկուսացնելու համար։ Մասնավորապես, երեկ տեղեկություն հայտնվեց, թե ոստիկանության Նոր Նորքի բաժնում նյութեր են նախապատրաստում Երևանի նախկին քաղաքապետ Հայկ Մարությանի պաշտոնավարման ընթացքում տեղի ունեցած մի դեպքի փաստով։
Տվյալներ են ստացվել, թե իբր Հայկ Մարությանը 2019 թվականի փետրվարին առանց նպատակային նշանակությունը փոխելու Բագրևանդ փողոցում գտնվող հողամասում տրամադրել է ռեստորանային համալիրի վերակառուցման ընդլայնման և նոր մակերեսով մասնաշենք կառուցելու նախագծման և հետագայում նաև շինարարության թույլտվություն։ Այլ հարց, որ Մարությանը բավական զգույշ է եղել իր աշխատանքի ընթացքում և ցանկացած փաստաթուղթ մինչև վերջ ուսումնասիրել է։ Ընդամենը ՊՎԾ հայտարարությունների և այժմ էլ դաշտ նետված այս կեղծ ահազանգի վերաբերյալ կարելի է փաստել, որ փաշինյանական ռեժիմն ամեն ինչ անելու է իր նախկին մերձավոր զինակցին մեկուսացնելու, նրա հնարավոր մոնո ներկայացումը կանխելու համար։
Ավելին, Հայկ Մարությանն ինքն էլ չի բացառում, որ մտադիր է առաջիկայում մասնակցել Երևանի քաղաքապետի ընտրություններին, ինչը կարող է լրջորեն սասանել փաշինյանական վարչախմբի դիրքերը և լուրջ հարված կարող է լինել նրանց դիրքերին, և սա է ըստ ամենայնի պատճառը, որ ցանկանում են գործ սարքել Հայկ Մարությանի նկատմամբ։
Մովսես Հայրապետյան
