Պետության թուլության հետևանքները

Հայաստանյան իշխանական լրատվամիջոցներն ու կառավարական ֆեյքերը երեկ ամբողջ օրը ներկայացնում էին ԵԱՏՄ երկրների վարչապետի ընդլայնված նիստի մանրամասները, ցույց տալիս, թե որքան «հզոր» է Նիկոլ Փաշինյանը, որը այդ կարևորագույն նիստում Ռուսաստանի և այլ երկրների վարչապետների մասնակցությամբ բարձրացրել է հերթական անգամ գազի գնի վերաբերյալ իր ցանկությունները։

Իշխանական որևէ լրատվամիջոց այդպես էլ չհայտնեց, որ Ադրբեջանի վարչապետ Ալի Ասադովը առաջին անգամ հյուրի կարգավիճակով մասնակցել է վարչապետների ընդլայնված նիստին, ընդ որում շնորհակալություն հայտնել Ռուսաստանի և Բելառուսի վարչապետներին։

Առաջին անգամը չէ, որ Ադրբեջանը մասնակցում է այլ միջազգային կառույցների աշխատանքին, որի անդամ չէ, և փոխարենը անդամ է Հայաստանը։

Մեր երկիրն, իհարկե, նման դեպքերում ունի վետո կիրառելու իրավունք, սակայն թե՛ այս դեպքում, թե՛ շատ այլ դեպքերում, բացարձակապես որևէ վետո չի կիրառվել, ընդհակառակը, Հայաստանի վարչապետը նույնիսկ իր դժգոհությունը չի հայտնել, որ Ադրբեջանի վարչապետ Ալի Ասադովը մասնակցում է նման նիստի և ներկայացնում իր սեփական երկրի շահերը։

Նշենք, որ ԵԱՏՄ շրջանակներում Հայաստանի հիմնական գործընկերները՝ Ղրղզստանը, Բելառուսը վաղուց այլևս հայտնի են որպես Ադրբեջանի գործընկերներ։ Ղազախստանի նախագահն էլ օրեր առաջ էր շնորհավորել Ադրբեջանին արցախյան պատերազմում տարած հաղթանակի և Ադրբեջանի «Տարածքային ամբողջականությունը» վերականգնելու ուղղությամբ։

Ըստ էության, հերթական անգամ արձանագրում ենք, որ Հայաստանի Հանրապետությունն իր թուլակամ արտաքին քաղաքականության հետևանքով, հայտնվում է մի իրավիճակում, երբ Ադրբեջանը կարողանում է տոն տալ նույնիսկ այն կառույցներին, որտեղ մեր երկիրը կարող էր վետո կիրառել։ Առաջիկայում բազմաթիվ նման դեպքերի ականատես ենք լինելու, երբ Ադրբեջանը կկարողանա մասնակցել տարբեր միջոցառումների, առաջ մղել իր տնտեսական և քաղաքական շահերը, իսկ Նիկոլ Փաշինյանը և նրա սպասարկուները արձագանքելու, դժգոհելու իրենց վետոն կիրառելու փոխարեն, ընդհակառակը, կսպասարկեն ադրբեջանական պետության շահերը։

Վաչագան Գրիգորյան