Չի լինի Ղարաբաղ, չի լինի Ադրբեջան, կլինեն Երեւանի եւ Բաքվի գուբերնիաներ. Ժիրինովսկի
ՄԻՋԱԶԳԱՅԻՆԵրբ որ Ռուսաստանը վերականգնի նախկին ԽՍՀՄ-ի սահմանները, ոչ Ղարաբաղը կլինի եւ ոչ էլ՝ Ադրբեջանը: Ռուսական կրեմլամետ «Царьград» հեռուստաալիքով հեռարձակվող «Чай с Захаром» հաղորդման ժամանակ երեկ ուշ երեկոյան նման հայտարարություն է արել Ռուսաստանի Լիբերա-դեմոկրատական կուսակցության նախագահ Վլադիմիր Ժիրինովսկին: «Ահա Ղարաբաղը, նրանք երբեք չեն լուծի այդ հարցը: Հայաստանի եւ Ադրբեջանի միջեւ հավերժ պատերազմ կլինի: Իսկ երբ մենք այդ բոլորը վերցնենք, խնդրեմ, չի լինի Ղարաբաղ, չի լինի Ադրբեջան, կլինեն Բաքվի եւ Երեւանի գուբերնիաներ:Կլինի ինչպես ցարի օրոք էր: Եվ վերջ: Անվտանգություն կլինի, կենսամակարդակ կլինի, հեռանկար կլինի: Ինչ վերաբերում է մշակույթին, ստեղծագործեք: Ամեն ինչ կթարգմանեն ռուսերեն:Բոլորը կմոռանան իրենց գրողներին եւ մնացած ամեն ինչ»,- ասել է Ժիրինովսկին:
Միաժամանակ, իր էքսցենտրիկ վարքագծով քաղաքական գործիչն ասել է, որ եթե ինքը լիներ Ռուսաստանի նախագահ, ապա Դոնալդ Թրամփին կառաջարկեր գործարք, ըստ որի՝ Չինաստանի եւ Իրանի հետ հարաբերությունները Մոսկվան կկառուցեր այնպես, ինչպես ԱՄՆ-ն կամենար, իսկ Վաշինգտոնը, իր հերթին, չխոչընդոտեր հետխորհրդային նախկին հանրապետությունների միացմանը Ռուսաստանին:
«Մաքուր առեւտուր: Չէ որ Թրամփը գործարար է: Նման գործարքը նրան ձեռնտու է: Եթե հետխորհրդային հանրապետությունները տեսնեն, որ ԱՄՆ-ն այլեւս չի խառնվում, իրենք կվազեն Կրեմլի հսկողության տակ: Այսինքն՝ մենք Չինաստանի ու Իրանի հետ հարաբերությունները հաստատում ենք այնպես, ինչպես Թրամփը կամենա, իսկ դրա դիմաց նա 1-1.5 տարի աչք է փակում ԽՍՀՄ սահմանների վերականգնման վրա: Իրականում մենք ավելի մեծ զիջումներ ենք անում, քան Թրամփը: Նա թքած ունի Ադրբեջանի, Ուկրաինայի, Բելառուսի, Մերձբալթիկայի եւ Ղազախստանի վրա», -նշել է Ժիրինովսկին, ապա հավելել, թե այդ դեպքում ոչինչ չի խանգարի Ռուսաստանին խաղաղ ճանապարհով վերականգնել ԽՍՀՄ-ի սահմանները:
Հաղորդման՝ Արցախի հիմնահարցին առնչվող հատվածը կարող եք դիտել տեսանյութի 15-րդ րոպեից:
