Թուրքական քարոզչական արշավ․ Հայաստանին շտապեցնում են

Թուրքական իշխանությունները բոլոր ուղղություններով տեղեկատվական գրոհի են նետվել Հայաստանի դեմ, փորձում են ամեն գնով պարտադրել Հայաստանին ընդունել իրենց պայմանները՝ հայ-թուրքական կարգավորման գործընթացի բանագնացների հանդիպումը Հայաստանում կամ Թուրքիայում անցկացնելու վերաբերյալ։

Երեկ մի ամբողջ շարք թուրքական առաջատար թերթեր և հեռուստաընկերություններ անդրադարձել էին հայ-թուրքական կարգավորման գործընթացին։ Թուրքիայի արտգործնախարար Մևլյութ Չավուշօղլուն շեշտել էր, որ Հայաստանի հետ հարաբերությունների կարգավորման թեման համակարգվում է Բաքվի հետ։ Նա տարօրինակ է համարել, որ Հայաստանում այդ փաստից անհանգստանում են։

«Մենք պարզ ենք, ամենասկզբից էլ ասել ենք՝ Հարավային Կովկասում հնարավոր չէ առանձին-առանձին մտածելով, այս հարցում Հայաստանը պետք է համարձակ ու վճռական լինի, պետք է հրաժարվի խուսափելու քաղաքականությունից»,- ասել է Չավուշօղլուն։

Հայաստանի արտգործնախարարությունը նախօրեին հայտնեց, թե Հայաստանի և Թուրքիայի հատուկ բանագնացների հաջորդ հանդիպման վերաբերյալ որևէ պայմանավորվածություն դեռ չկա։ Մինչդեռ թուրքական մի ամբողջ շարք լրատվամիջոցներ տեղեկություններ են տարածել, թե բանագնացների 5-րդ հանդիպումը կայանալու է սեպտեմբերին։

Ավելին, երեկ նաև տեղեկություն տարածեցին, թե հանդիպումը ամենայն հավանականությամբ կայանալու է Կարսում։ Հատուկ այդ նպատակի համար թուրքերը վերջին շրջանում ականազերծման աշխատանքներ էին իրականացնում Կարսի ուղղությամբ սահմանային անցակետերի մերձակայքում։

Թուրքիայի հատուկ բանագնաց Սերդար Քըլըչն էլ հայտարարել է, թե պատրաստ է այցելել Երևան և այնտեղ հանդիպել իր գործընկերոջը՝ Ռուբեն Ռուբինյանին։ Թուրքական «Հուրիեթ» թերթի տեղեկություններով, բանակցային գործընթացի ողջ ընթացքում, 4 հանդիպում և 500-ից ավելի հեռախոսազանգ է կայացել Սերդար Քըլըչի և Ռուբեն Ռուբինյանի միջև։ Ընդ որում թուրքական թերթը կարծես ծաղրում է Ռուբինյանին՝ նշելով, թե Քըլըչի և Ռուբինյանի միջև «քիմիա» կա, նրանք հրաշալի հասկանում են միմյանց։

Թուրքական մեկ այլ առաջատար պարբերական՝«Միլիեթ»-ն էլ նշել է, թե Անկարան առաջարկել է բանագնացների 5-րդ հանդիպումն անցկացնել Անկարայում կամ Երևանում, կամ սահմանամերձ որևէ քաղաքում, օրինակ Կարսում։

Տեղեկատվական այս գրոհը և միջազգային հանրությանը լսեցնելը, թե Թուրքիան պատրաստ է հարաբերությունների կարգավորմանը, վկայում է մեկ բանի մասին, մեր հարևանները շտապում են, ընդ որում շտապում են հարաբերությունները վերջնականապես կարգավորել ի վնաս Հայաստանի և դա անել մինչև առնվազն Թուրքիայում կայանալիք նախագահական ընտրությունները։

Թաթուլ Մինասյան