Վիճակագրական ցուցանիշները՝ վարչախմբի ստախոսության առիթ

Հայաստանի վիճակագրական կոմիտեն հրապարակել է այս տարվա առաջին կիսամյակի ցուցանիշները։

Փաշինյանական վարչախմբի ներկայացուցիչները սիրում են տարածել, թե հունվար-հունիսի տվյալներով երկնիշ աճ է գրանցվել՝ 11,8 %։ Աճը բոլոր ոլորտներում է, բացի գյուղատնտեսությունից, որտեղ 5,5 %-ով անկում է գրանցվել։

Արտաքին առևտրաշրջանառության ծավալն աճել է 44 %-ով, իսկ ներմուծումը՝ 48,7 %-ով։ Իհարկե, բազմաթիվ մասնագետներ նշում են, որ տնտեսական այս աճը հանրությունն իր վրա չի կարող զգալ, քանի որ առավելապես կապված են Ռուսաստանից և Ուկրաինայից հազարավոր մարդկանց Հայաստան ժամանելու, այստեղ հայկական բանկերի միջոցով գումարներ փոխանցելու հետ։

Ըստ էության, այդ գումարները, ըստ մասնագետների, որևէ կերպ չեն կարող երկարաժամկետ էֆեկտ ունենալ և ընդամենը կարճաժամկետ ազդեցություն կարող են ունենալ, այն էլ չափազանց կասկածելի է՝ դրակա՞ն, թե՞ բացասական։ Վիճակագրական կոմիտեն այլ, չափազանց ուշագրավ տեղեկություններ է հրապարակել, որոնք գործող իշխանությունները ամենևին էլ չեն ցանկանում տարփողել և ներկայացնել հանրությանը։

Մասնավորապես պարզվում է, որ անցած տարվա նույն ժամանակահատվածի համեմատությամբ, Հայաստանի բնակչության նվազում է տեղի ունեցել՝ 2700 մարդով։ Տարեկան կտրվածքով դա բավական լուրջ թիվ է կազմում՝ հատկապես հաշվի առնելով 44-օրյա պատերազմից հետո Հայաստանում ստեղծված իրավիճակը։ Շատերը հեռանում են Հայաստանից, այդպես էլ չվերադառնալու իրենց մտադրությամբ։ Պարզվում է նաև, որ նախորդ տարվա հունվար-հունիսի համեմատությամբ այս տարվա նույն ժամանակահատվածում աճել են գրանցված հանցագործությունների թիվը։ Ազգային վիճակագրական կոմիտեի տվյալներով, եթե նախորդ տարվա հունվար-հունիսին գրանցվել էր 13792 հանցագործություն, ապա այս տարվա նույն ժամանակահատվածում՝ 17000 դեպք, ինչը գրեթե 3200-ով ավելի է, քան նախորդ տարվա տվյալը։

Ըստ էության, աճել են նաև առանձնապես ծանր հանցագործությունների դեպքերը։ Ի թիվս այլ հանցագործությունների աճել են մասնավորապես պետական իշխանության ծառայության և կառավարման կարգի դեմ ուղղված հանցագործությունները։ Նախորդ տարվա 1327-ի դիմաց՝ 1535 դեպք, ինչը վկայում է, որ փաշինյանական իշխանության տարիներին Հայաստանը վերածվել է կրիմինալի որջի, որտեղ որևէ կերպ շարքային քաղաքացին իրեն պաշտպանված չի կարող զգալ։ Հիշեցնենք, որ Փաշինյանը իշխանության էր գալիս օրենքի գերակայություն հաստատելու և արդարությունը վերականգնելու կարգախոսներով։ Փաստենք, որ այս հարցում էլ ևս գործող վարչախումբը լրջորեն տապալվել է։

Միհրան Ավետիսյան