Ե՛վ գեղեցիկ տեսարան, և՛ թարմություն. Հայաստանի բնակիչներն ու հյուրերը զովանալու համար գնում են Սևանա լիճ
ՀԱՍԱՐԱԿՈՒԹՅՈՒՆ
Mir24.tv-ն գրում է, որ Հայաստանում շոգ է, արդեն մի քանի շաբաթ է, ինչ ջերմաստիճանը 40 աստիճանից չի իջնում։ Ուստի բնակիչներն ու զբոսաշրջիկները հանգստյան օրերն ու արձակուրդներն անց են կացնում հանրապետության մարգարիտ Սևանա լճում։ Այժմ այնտեղ կան երեք անվճար լողափեր։ МИР 24-ի թղթակից Նոնա Հովհաննիսյանը տեսել է հանգստի պայմանները:
Հայաստանի մայրաքաղաքում կիզիչ արև է ու անտանելի շոգ: Այստեղ ալպյան Սևանա լճի վրա զով քամի և մաքուր օդ է։ Երևանի հետ տարբերությունը 10 աստիճան է։ Մայրաքաղաքի շոգից որոշել է փախչել նաև ռուս զբոսաշրջիկ Նադեժդա Լունգը։ Նա պատմել է, որ վաղուց էր երազել Հայաստան մեկնելու մասին, բայց համաճարակի պատճառով անընդհատ հետաձվել է, իսկ հիմա երկրորդ օրն է հանգիստը վայելում Սևանի լողափում։
«Երևանի եղանակը, իհարկե, մեզ համար շատ անսովոր էր։ Իհարկե շատ շոգ է։ Այստեղ հարմար է։ Լիճը գեղեցիկ է, այն հիացնում է իր գույնով, տեսարանով և թարմությամբ: Դա ուղղակի զարմանալի երևույթ է»,- կիսվել է Նադեժդան:
Այստեղ լողի սեզոնը տևում է երկու ամիս՝ ջուրը տաքանում է մինչև +20։ Եվ չնայած օդի ջերմաստիճանը մոտավորապես նույնն է, բոլորին հարմար է։ Մարդիկ գալիս են ընտանիքներով։
«Թոռները եկան մեզ հյուր, բերեցինք այստեղ, որ առաջին հերթին նրանք տեսնեն Սևանը։ Երկրորդ անգամ ենք եկել։ Երկու շաբաթ առաջ էինք այստեղ, բայց նորից ուզում էին լողալ»,- պատմել է երևանցի Արծվիկ Գրիգորյանը։
Օդերևութաբաններն ասում են, որ հանրապետությունում ուլտրամանուշակագույն ճառագայթման ինտենսիվությունը նորմայից բարձր է։ Եվ պետք չէ մոռանալ նախազգուշական միջոցների մասին նույնիսկ հանգստավայրում: Անպայման պետք է կրել գլխարկներ և ձեզ հետ բերել խմելու ջուր։
«Ժամը 12-ից հետո չես կարող դուրս գալ, այլապես կարող ես արևահարվել»,- ասում է զբոսաշրջիկ Աննա Պարսամյանը։
«Դու կարող ես քեզ փրկել ջրով։ Այստեղ կարելի է լողալ, լողալ, բայց պետք է կրեմ քսել, այլապես կարող ես այրվել»,- ասել է Դավիթ Պարսամյանը։
Սևանն ունի հանգստի համար նախատեսված բոլոր ենթակառուցվածքները, կան սրճարաններ և ռեստորաններ։ մարդիկ կարող են վարել ռեակտիվ դահուկներ, առագաստանավեր և բայդարկաներ: Գները մինչև յոթ հազար դրամ են՝ մոտ 900 ռուբլի։ Հյուրանոցում չորս հոգու մեկ գիշերը արժե 30 հազար դրամ կամ չորս հազար ռուբլի։ Առանձին տունն ավելի թանկ արժե, բայց չնայած պիկ սեզոնին, գները նույնն են, ինչպես նախորդ տարի։
Նյութը հրապարակման պատրաստեց Կամո Խաչիկյանը
