Ընդդիմությունը նոր հարված է պատրաստում Փաշինյանի համար
ՔԱՂԱՔԱԿԱՆՈՒԹՅՈՒՆ
Ng.ru-ն գրում է, որ ընդդիմադիր «Դիմադրության շարժումը» հերթական անգամ փոխել է իր մարտավարությունը Նիկոլ Փաշինյանի իշխանության դեմ պայքարում։ Օգոստոսին ընդդիմության առաջնորդները մտադիր են ակտիվացնել քարոզարշավը մարզերում։ Ամսվա կեսին նրանք նախատեսում են կազմակերպել համահայկական համաժողով, որին հրավիրելու են Հայաստանի, Արցախի և հայկական սփյուռքի ականավոր ներկայացուցիչներին։ Հայտարարված պլանում գագաթնակետը կլինի «համահայկական հանրահավաքը Արցախի անկախության տոնի առթիվ, որը նշվում է սեպտեմբերի 2-ին»:
Ընդդիմության հանրահավաքների հիմնական զեկուցող, ԱԺ «Հայաստան» խմբակցության պատգամավոր Իշխան Սաղաթելյանի խոսքով սեպտեմբերի 2-ին Արցախում նույնպես սոցիալական միջոցառումներ են տեղի ունենալու։ Ընդդիմադիրները կարծում են, որ Արցախում և Հայաստանում այդ օրվա համատեղ նշումը կարող է նվազեցնել կամ նույնիսկ վերացնել այն ճեղքը, որն առաջացել է Երևանի և Ստեփանակերտի հարաբերություններում։ Նրանք այդ ամենում, իհարկե, մեղադրում են «Արցախի նկատմամբ դավաճանական քաղաքականություն» վարող Նիկոլ Փաշինյանին։
Հիշեցնենք, որ ընդդիմությունը 44-օրյա պատերազմից հետո ստորագրված բոլոր պայմանագրերը համարում է Փաշինյանի զիջումները Ադրբեջանին։ Իսկ Արցախի նկատմամբ քաղաքական պահանջների նշաձողն իջեցնելու անհրաժեշտության մասին արտահայտությունը նրա «դավաճանության» պսակ է համարվում։
«Մենք չենք դադարեցնում հանրահավաքներն ու արտակարգ գործողությունները: Անհրաժեշտության դեպքում դրանք կիրականացնենք։ Մենք ուշադիր հետևում ենք աշխարհաքաղաքական բոլոր իրադարձություններին և անարձագանք չենք թողնի դրանցից որևէ մեկը»,- ասել է Սաղաթելյանը։
«Դիմադրության շարժման» մարտավարության հերթական փոփոխությունն անհրաժեշտ է, քանի որ բնակչության հանրահավաքային ակտիվությունը նկատելիորեն նվազել է։ Իհարկե, արձակուրդների ժամանակը, ամառային շոգը, որը չի նպաստում փողոցային երթերին ու զանգվածային միջոցառումներին, ևս ազդեցություն է ունենում, բայց առավել ևս, կարծես թե, փաստն այն է, որ ընդդիմադիրներն իրականում չեն ներկայացրել որևէ գրավիչ գործողությունների ծրագիր կամ գաղափար, բացառությամբ Հայաստանի վարչապետ Նիկոլ Փաշինյանին և նրա թիմին իշխանությունից հեռացնելուց: Բայց միայն ատելության լեզվով, ինչպես ցույց է տալիս պրակտիկան, հեռու գնալ չի կարելի։
Մինչդեռ բուն Արցախում իրավիճակը շարունակում է բարդ մնալ։ Հակամարտող կողմերը փոխանակվում են զինադադարի խախտման մեղադրանքներով։ Եթե որպես օբյեկտիվ աղբյուր վերցնենք ռուս խաղաղապահների հաղորդումները, ապա, որպես կանոն, ադրբեջանական ուժերն են մեղավոր հրադադարի խախտման համար։ Դա սուր քննադատության է ենթարկվում Բաքվի կողմից, որը կարծում է, որ Լեռնային Ղարաբաղում խաղաղապահների հրամանատարությունը հայանպաստ դիրք է զբաղեցնում։ Դրանով է ադրբեջանական կողմը բացատրում ռուսական կապույտ սաղավարտների մնալու ժամկետը հակամարտության տարածաշրջանում չերկարաձգելու իր ցանկությունը։
Իր հերթին հայկական կողմը համոզված է, որ Ադրբեջանն ուղղակի փորձում է բացառել արցախյան հարցը հայ-ադրբեջանական բանակցությունների օրակարգից։
Արցախի պետնախարար Արտակ Բեգլարյանը սոցցանցերում նշել է, որ Ադրբեջանի ռազմաքաղաքական ղեկավարության վերաբերմունքը հայերի նկատմամբ տասնամյակներ շարունակ դրսևորվել է ատելությամբ, հոգեբանական և ֆիզիկական բռնությամբ, և հիմք չկա անգամ ենթադրելու, որ այդ գիծը կփոխվի տեսանելի ապագայում։
«Քանի դեռ Ադրբեջանի իշխանություններն ու ժողովուրդը պատրաստ չեն իրական երկխոսության և խաղաղության, հակամարտությունը չի լուծվի, և տարածաշրջանում կայունություն չի կարող լինել։ Արցախի ժողովրդի ինքնորոշման իրավունքի ճանաչումն ու պաշտպանությունն այլընտրանք չունի... Եվ դա նոր ցեղասպանություն կանխելու միակ ճանապարհն է»,- ամփոփել է Արտակ Բեգլարյանը։
Պաշտոնական Երևանը բավական հանգիստ է ընդունում այն ամենը, ինչ կատարվում է: Բողոքի ակցիաների ամենաեռանդուն ընդդիմադիրներին կարճ ժամանակով կալանավորում են, տուգանում ու ազատում մինչև նոր իրավախախտում։ Վարչապետ Նիկոլ Փաշինյանը լռիվ լուռ է՝ արձակուրդում է և չի հայտնվում հանրությանը: Պաշտոնական տվյալներով նա իր հանգիստն անցկացնում է Հայաստանի լեռներում։
Նյութը հրապարակման պատրաստեց Կամո Խաիկյանը
