Վարչախումբը վարկաբեկում է զինված ուժերը

Հայաստանի գործող վարչախումբը շարունակում է իր հարձակումները հայկական բանակի և հայ զորահրամանատարների նկատմամբ։ Խնդիրը մեկն է՝ ամեն գնով մաքրել փաշինյանական վարչախմբին դավաճանի պիտակից, իսկ պատերազմում կրած պարտության մեղքն ամբողջությամբ բարդել բանակի վրա։

Ազգային անվտանգության ծառայությունը հաղորդագրություն է տարածել, թե 2022 թվականի ընթացքում պետական դավաճանություն կատարելու դեպքերով մեղադրական եզրակացությամբ դատարան են հանձնվել ընդհանուր թվով 5 քրեական վարույթներ 12 անձանց վերաբերյալ։ Ընդ որում բոլոր դեպքերում նշվում է, թե այդ մարդիկ գործող կամ նախկին զինծառայողներ են, հնարավորություն են ունեցել լինել զորամասերում կամ դիրքերում, ռազմական տեղեկություններ և գաղտնիքներ հավաքել, փաստաթղթեր ձեռք բերել, տեսանկարահանումներ իրականացնել և դրանք փոխանցել թշնամուն։

Մեկ այլ դեպքով էլ քննչական կոմիտեն է մեղադրանք առաջադրել Մատաղիսի զորամասի հրամանատար Սևակ Աբրահամյանին և կալանավորել նրան։ Ըստ մեղադրանքի՝ պաշտպանական շրջանի հրամանատարը իբր պատերազմից մեկ օր առաջ 100 սպաների մասնակցությամբ խնջույք է կազմակերպել, իսկ այդ ընթացքում զեկուցել են ադրբեջանական ստորաբաժանումների կուտակումների և տեղաշարժերի մասին, և նա ոչինչ չի ձեռնարկել։

Փաշինյանական վարչախումբն, ըստ էության, մեկ խնդիր է դրել իր առջև. ամեն գնով վարկաբեկել հայ զինվորին և հայ սպային պատերազմում կրած պարտությունը բարդել նրանց վրա։ Դրա համար օգտագործում են թե՛ իշխանական քարոզչամեքենան, թե՛ իրավապահ մարմինները, որոնց առջև դրվել է խնդիր՝ ամեն կերպ հանրությանը համոզել, թե հայ գեներալները և սպաները ապիկար են, դավաճան, հարբեցող և միտումնավոր վնաս են հասցրել հայկական բանակին։ Սա հրաշալի հնարավորություն է ստեղծում Փաշինյանի համար, պատերազմի ամբողջ մեղքը բարդել հայկական բանակի վրա։

Տասնամյակներ շարունակ հայկական բանակն է համարվել Հայաստանի ողնաշարը և հանրությունն առանձնակի գորովանքով է վերաբերվել իր բանակին, որդիներին, ովքեր անմնացորդ ծառայում են Հայաստանի Հանրապետությանը։ Իսկ 2020 թվականի 44-օրյա պատերազմում գրեթե 4000-ից ավելի հայ զինվորներ, սպաներ ու կամավորականներ իրենց կյանքը տվեցին հանուն հայրենիքի։ Եվ չկա որևէ այլ բառ, որը կբնորոշեր փաշինյանական վարչախմբի արարքը, քան դավաճանությունն է։

Խաչատուր Բադալյան