ԲԴԽ զավթումը տեղափոխվեց այլ օր

Փաշինյանական վարչախմբին չհաջողվեց երեկ յուրացնել Բարձրագույն դատական խորհուրդը։ Օրենքով սահմանված տասնօրյա ժամկետն ավարտվել էր երեկ, և ԲԴԽ-ն պարզապես պետք է նոր նախագահ ընտրեր, մինչդեռ առաջադրված միակ թեկնածուն՝ Սորոսի հիմնադրամի նախկին համակարգող Դավիթ Խաչատուրյանը, չի ստացել անհրաժեշտ ձայների քանակը, որպեսզի կարողանա դառնալ ԲԴԽ նախագահ։

Նախքան քվեարկությունը Բարձրագույն դատական խորհուրդը դադարեցրել էր Գագիկ Ջհանգիրյանի և ԲԴԽ մեկ այլ անդամ, Վճռաբեկ դատարանի դատավոր ընտրված՝ Լիպարիտ Մելիքջանյանի լիազորությունները։ Եվ այս պայմաններում սպասելի էր, որ ԲԴԽ-ն կընտրի նոր նախագահ, շրջանառվում էին Գրիգոր Բեկմեզյանի և Դավիթ Խաչատուրյանի անունները։ Մինչդեռ որևէ մեկին այդպես էլ չհաջողվեց ընտրել։

Ավագության կարգով ԲԴԽ նախագահի պաշտոնակատար պետք է դառնար Ստեփան Միքայելյանը։ Նա, նշենք, մասնակցում էր Գագիկ Ջհանգիրյանի և Ռուբեն Վարդազարյանի հայտնի կերուխումին, որի ձայնագրությունը մեկուկես տարի անց հայտնվեց լրատվամիջոցներում և մեծ աղմուկ բարձրացրեց։ Միքայելյանն ինքն է դիմում ներկայացրել՝ հրաժարվելով կատարել այդ պարտականությունները, և այժմ ժամանակավոր պաշտոնակատար է նշանակվել Սերգեյ Չիչոյանը։

Մեր տեղեկությունների համաձայն՝ իշխանությունները պատրաստվում են առաջիկայում լրացնել ԲԴԽ կազմը իրենց ցանկալի անձանցով, նոր դրանից հետո ԲԴԽ նախագահ ընտրել։ Այդ հարցում, սակայն, այնքան էլ չեն շտապում, սպասում են առնվազն մինչև սեպտեմբեր, և սեպտեմբերի 15-ին գլխավոր դատախազը կհանձնի իր պաշտոնը Աննա Վարդապետյանին, իսկ ինքն էլ հնարավորություն կունենա իշխանության կողմից առաջադրվել Բարձրագույն դատական խորհրդի կազմում։

Ամռան ողջ ընթացքում Ազգային ժողովը արտահերթ նիստեր է գումարելու տարբեր հարցերով, տարբեր օրինագծերի քննարկումն օրինականացնելու համար, սակայն նրանց նշվել է, որ ԲԴԽ հարցով առայժմ չշտապել։ Փաշինյանը ԲԴԽ-ի վերաբերյալ սեփական նկատառումներն ունի և ցանկանում է այնտեղ վստահելի մեկին առաջադրել։

Արթուր Թորոսյան