Ի՞նչ է կատարվում ընդդիմության շարքերում

«Հայաստան» խմբակցության պատգամավոր Արթուր Ղազինյանը վայր է դնելու իր մանդատը։ Ֆեյսբուքի իր էջում նա նշել է, թե ստեղծված իրավիճակում այդ քայլը համարում է ամենաճիշտ ու արդարացված որոշումը: Ղազինյանն իր որոշման պատճառները չի նշում, նկատում է, թե դրանք քաղաքական և մարտավարական են։ ԶԼՄ-ներում տեղեկություններ են տարածվում, թե առաջիկայում այդ խմբակցությունը լքելու են նաև Էլինար Վարդանյանը և ևս մեկ պատգամավոր, որի անունն առայժմ չի նշվում։

«Դիմադրություն շարժման ձախողումը իշխանության նկատմամբ հանրային ահռելի անվստահության պայմաններում ընդդիմադիր շարժումը տապալելու համար խորհրդարանական գործող ընդդիմությունը դեռևս կրելու է քաղաքական պատասխանատվություն, և, ըստ էության, ընդդիմադիր բազմաթիվ առաջնորդներ և գործիչներ հասկանում են, որ կա՛մ պետք է մնան խորհրդարանում և իրենք կրեն պարտության պատասխանատվությունը, հետագայում նաև չկարողանան նոր պայքար գեներացնեն Նիկոլ Փաշինյանի դեմ, կա՛մ էլ պետք է ջանքեր գործադրեն նոր ընդդիմադիր շարժում նախաձեռնելու։

Ամենակարևոր հարցն այդ առումով սեփական դեմքը պահպանելն է։ Թե՛ Արթուր Վանեցյանը, թե՛ Ղազինյանը, թե՛ մյուսներն ովքեր հեռանալու են, ունեն հնարավորություններ հանրային մեծ զանգվածների հավաքելու, ռեալ տեսլական, առաջնորդի անուն հայտնելու և այդ կերպ էլ պայքար սկսելու Փաշինյանի դեմ, առավել ևս, երբ որ «Հայաստան» դաշինքը այլևս չի կարողանա ուշքի գալ ստացած հարվածից, երբ հանրությունը պարզապես ոտքի չկանգնեց ընդդիմության կողքին և չպայքարեց Նիկոլ Փաշինյանի դեմ։

Որքան էլ Իշխան Սաղաթելյանը և մյուսները հայտնում էին, թե դիմադրության շարժմանը հազարավոր մասնակիցներ են մասնակցում, ժողովուրդը բնավ էլ, հատկապես տեխնիկայի դարում, ապուշ չէ և հրաշալի տեսնում էր, որ օրեցօր նվազող շարքերը և ոչինչ չասող հռետորաբանությունը որևէ լավ տեղ չէր տանելու այս ընդդիմությանը։

Խաչատուր Մարտիրոսյան