Փաշինյանական ռեպրեսիվ մեքենան ճանապարհից հեռացնում է ընդդիմադիրներին

Հայաստանի Ազգային ժողովն այսօր արտահերթ նիստ է գումարել։ Քննելու են «Քաղաքացիական պայմանագիր» խմբակցության միջնորդությունը Ազգային ժողովի խորհրդին` արտահերթ նիստում Խորհրդարանի ընդդիմադիր փոխնախագահ Իշխան Սաղաթելյանին և Տնտեսական հարցերի հանձնաժողովի նախագահ Վահե Հակոբյանին պաշտոնանկ անելու վերաբերյալ։

Իշխող մեծամասնությունը կարող է առանց դժվարության ապահովել որոշման համար անհրաժեշտ 54 ձայնը և, ըստ ամենայնի, վաղը այլևս Խորհրդարանը չի ունենա ընդդիմադիր փոխխոսնակ և տնտեսական հանձնաժողովի նախագահ։

Հիմնավորման մեջ փաշինյանական իշխանությունը իսկապես ծաղրել է Հայաստանի քաղաքացուն և օրենքը։ Իշխան Սաղաթելյանին, մասնավորապես, մեղադրում են հասարակական համերաշխությունը ամրապնդելու փոխարեն, անկարգություններ հրահրելու, սադրանքներ անելու, ինչպես նաև գործող իշխանությունների նկատմամբ ատելության խոսք տարածելու մեջ։

Այն, որ այդ ատելության խոսքը ամեն օր հորդում է իշխանական սպասարկուների բերաններից, իսկ Նիկոլ Փաշինյանը ընդդիմության հետ հարաբերվում է մուրճը ձեռքին, գործող իշխանություններին բնավ չի անհանգստացնում։ Նրանք իրենց առջև խնդիր են դրել զրկել, պատժել Իշխան Սաղաթելյանին և Վահե Հակոբյանին։

Դիմադրության շարժումն էլ հավաքվել էր Ազգային ժողովում՝ Դեմիրճյան մուտքի մոտ։ Մեծ առումով այս ակցիան զուտ բացարձակապես քաղաքական դիրքորոշում հայտնելու վերաբերյալ է, որևէ այլ բան ընդդիմությանը չի հաջողվի անել, քանի դեռ գործող իշխանությունները մնում են իրենց պաշտոններին, իսկ հանրային մեծ ընդվզում չկա նրանց հեռացման և պատժելու համար, փաշինյանական վարչախումբն անելու է այն, ինչ իր քեֆը քաշի՝ բացարձակապես թքած ունենալով օրենքի և օրինականության վրա։

Միհրան Ոսկանյան