Վարչախումբը փորձում է կոծկել Ապարանի դեպքերը

Փաշինյանական վարչախումբն ամեն գնով ցանկանում է կոծկել նախօրեին Ապարանում տեղի ունեցած միջադեպը, որի հետևանքով 3 մարդ սպանվեց, չորս անձ էլ վիրավոր է և գտնվում է հիվանդանոցում։ Ապարանում երկու խմբերի միջև հաշվեհարդարի վերածված այս դեպքը, հերթական անգամ վկայում է երկրում ամենաթողության մթնոլորտի մասին, իսկ Նիկոլ Փաշինյանը և իր կողմնակիցները զբաղված են ոչ թե դեպքը բազմակողմանի և թափանցիկ քննելու գործողություններով, այլ ամեն ինչ անում են, որպեսզի այն կոծկվի և իշխանության վրայից հեռացվեն կասկածի սլաքները։

Դեպքից հաշված ժամեր անց ընդդիմադիր լրատվամիջոցները տեղեկություն տարածեցին, որ խմբերից մեկը կապված է Նիկոլ Փաշինյանի հետ։ Մյուս՝ տվյալ դեպքում տուժող խումբը, կապ ունի Ապարանի գործող քաղաքապետ Կարեն Եղիազարյանի հետ, զոհվածներից մեկն էլ նրա ազգականն է, ով աշխատում էր Եղիազարյանին պատկանող «Գնթունիկ» սուպերմարկետում։ Ոստիկանությունը անմիջապես արձագանքեց, տեղեկություն տարածեց, թե իբր միջադեպը տեղի է ունեցել երթևեկության ժամանակ իրար ազդանշան տալու պատճառով և քաղաքական որևէ ենթատեքստ չունի։ Մինչդեռ ընդդիմադիր պատգամավորներն ու ակտիվիստները շարունակում են պնդել, որ գործը բացառապես քաղաքական է։

Իհարկե, իշխանությունը փորձելու է իր վրայից հեռացնել բոլոր սլաքները, հստակ գիտակցելով, որ Հայաստանում տեղի է ունեցած ցանկացած հակաօրինական դեպքի համար, մեղավոր է հենց իր իշխանությունը, նույնիսկ, եթե դեպքը քաղաքական ենթատեքստ չունի, այդուհանդերձ դրա հիմնական և գլխավոր մեղավորը Նիկոլ Փաշինյանն է, որի օրոք Հայաստանը վերածվել է քրեական հաշվեհարդարների ասպարեզի։ Ապարանը տասնյակ դեպքերից միայն մեկն է, երբ մարդիկ իրար հետ հարցերը լուծում են ոչ թե գաղափարով և մտքով, այլ հաշվեհարդարներով, ինքնաձիգներով և հրացաններով։

Առաջին հերթին այս ամենը վնասում է Հայաստանի Հանրապետությանը, և քաղաքացին կորցնելու է պաշտպանվածություն ունենալու զգացողությունը, մարդիկ 2018 թվականին, երբ ոտքի էին կանգնել առաջին հերթին ցանկանում էին ունենալ պաշտպանված և արդար հասարակություն, մինչդեռ այսօր կարող ենք փաստել, որ Սերժ Սարգսյանին մերժելուց 4 տարի անց Հայաստանում իրավիճակը ոչ թե կարգավորվել է, այլ դարձել է շատ ավելի անվերահսկելի, բարձիթողի և վտանգավոր։

Արեն Ներսեսյան