Քաղաքական գործիչների հայտարարությունները լավատեսություն չեն տալիս արտարժույթի վերաբերյալ կանխատեսումներ անելու համար
ՏՆՏԵՍՈՒԹՅՈՒՆԱրտարժույթի շուկայում կտրուկ տատանումները կարծես սովորական երևույթ են դարձել: Տնտեսագետ Թաթուլ Մանասերյանը 1or.am-ի հետ զրույցում նշում է, որ դա պայմանավորված է տասնյակ գործոններով.
«Այդ գործոններն ամեն օր փոփոխվում են: Առաջին հերթին ամեն ինչ կախված է Միացյալ Նահանգների արժույթային, դրամավարկային, տնտեսական քաղաքականությունից: Դրա վրա ազդում են քաղաքական գործոններ, մեծ ազդակ է նաև ռուս-ուկրաինական հակամարտությունը: Իհարկե, ազդեցություն են թողնում նաև Հայաստանի տնտեսական զարգացումները:
Ռուս-ուկրաինական հակամարտությունը ևս շատ անկանխատեսելի է: Ուկրաինական կողմը հայտարարում է, որ իրեն որոշ ուժեր դրդում են բանակցությունների, բայց դա իրենց պետության և ժողովրդի շահերից չի բխում: Արդեն հարյուր օրից ավել տևող ռազմական բախման օրերին բազմաթիվ դեպքեր են եղել, երբ մի բան ասվել է, մեկ այլ բան արվել՝ ինչպես մարդասիրական միջանցքների առումով, այնպես էլ հրադադարի կամ բանակցությունների: Այնպես որ, հատկապես քաղաքական գործիչների հայտարարությունները լավատեսություն չեն տալիս կանխատեսումներ անելու համար»:
Անդրադառնալով որոշակի ժամանակահատվածի կտրվածքով արտարժույթի կուրսի մոտավոր կանխատեսումների վերաբերյալ մեր հարցին՝ տնտեսագետը նշեց.
«Այդ հարցին ոչ ոք հստակ չի կարող պատասխանել, երևի միայն դիլետանտները կամ բախտագուշակները: Նույնիսկ չենք կարող ասել՝ վաղը ինչ պատկեր կլինի, որովհետև ազդող գործոնները շատ-շատ են և հարափոփոխ»:
Մարիամ Նալբանդյան
