Հյուսիսային Օսիան վերածվել է դեպի Անդրկովկաս շարժվող ծանր բեռնատարների հսկա ավտոկայանատեղիի
ՄԻՋԱԶԳԱՅԻՆ
Aif.ru-ն գրում է, որ Հյուսիսային Օսիան վերածվել է դեպի Անդրկովկաս շարժվող ծանր բեռնատարների հսկա ավտոկայանատեղիի, խցանումներ են նաև վրացական կողմում։ Վարորդները ճանապարհին հինգ օրվա փոխարեն մեկ ամիս են անցկացնում: Ինչո՞ւ են խցանումները սահմանին աճել և ե՞րբ դրանք կլուծվեն: Այդ ամենը փորձել է պարզել aif.ru-ն։
Մայիսի վերջին Հյուսիսային Օսիայում Վրաստանի հետ սահմանի մուտքի մոտ մոտ երեք հազար բեռնատար էր կուտակվել։ Նույն թիվը եղել էր նաև անցյալ տարվա մարտին, երբ վատ եղանակի պատճառով փակվել էր Ռուսաստանը Անդրկովկասի հետ կապող Ռազմավիրական մայրուղին։ Այժմ ճանապարհը բաց է, աշխատում է Վերին Լարսի անցակետը, բայց դա չի հեշտացրել բեռնատարների վարորդների կյանքը։
«Սովորաբար մեկ ամսում Հայաստանից Մոսկվա երկու չվերթ էինք կատարում, բացառությամբ ձմեռային ծանր շրջանին։ Այս տարի ունենք միայն երրորդ չվերթը,- դժգոհում են հայկական տրանսպորտային «Վաչիկ և Խաչիկ» ընկերության վարորդները, -Հայաստանից դուրս ենք եկել ապրիլի 29-ին, հիմա վերադառնում ենք Մոսկվայից, այսինքն՝ մեկ ամիս է, ինչ ճանապարհին ենք։ Ռուսաստան գնալու ճանապարհին լոլիկով բեռնված 17 օր կանգնել են Վրաստանում։ Անցյալ անգամ 25 օր Թբիլիսիի շրջանցիկում էինք, նույնպես լոլիկով։ Ամբողջ ճանապարհորդությունը տևել էր մոտ 45 օր։ Բեռնատարների հերթը ձգվում էր Ստավրոպոլի երկրամասի Պյատիգորսկ քաղաքից»։
Բեռնատարների վարորդները շարժման դիմաց են աշխատավարձ ստանում, ոչ ոք նրանց չի վճարում պարապուրդի համար: «Ճանապարհին հինգ օր կամ մեկ ամիս ուտելու միջև տարբերություն կա՞ թե չէ»,- հարցնում են նրանք: Երթուղիների միջև հանգստանալու ժամանակ չի լինում, քանի որ տրանսպորտային ընկերությունների բեռնատարները մեծ պահանջարկ ունեն, կա պակաս, շատերը Ռուսաստանի ներքին երթուղիներում են։
Ֆուրերը կայանված են ոչ միայն Վերին Լարսի մուտքի մոտ, այլ նաև հարակից ճանապարհներին։ Գիզելի մայրուղում վարորդները մոտ մեկ օր են անցկացնում, հերթում 55 ֆուր է։ Ոստիկաններն օրական թույլ են տալիս անցնել միջինը 200-ից 500 ավտոմեքենա։ Նման իրավիճակ է նաև Արխոնի մայրուղու վրա։
Թուրքիայից վարորդ Մեհմեդը մայիսի 15-ին Եվրոպայից մտել է Ռուսաստան, այժմ հերթ է կանգնել Վրաստանի հետ սահմանին։ Ասում է, որ նախկինում լաստանավով Եվրոպա էր գնում Սև ծովով և Ուկրաինայով, իսկ այժմ այդ երթուղին փակ է։ Նրա կարծիքով, հատուկ գործողության պատճառով լոգիստիկայի փոփոխությունն էլ հենց Հյուսիսային Օսիայում տրանսպորտային կոլապսի պատճառներից մեկն է։
Փոխադրողների համար այլընտրանքային ճանապարհ կարող է լինել Ադրբեջանով։ Բացի այդ, ապրիլից ռուսական Կավկազ նավահանգստի և թուրքական Կարասու նավահանգստի միջև լաստանավ է գործում, իսկ մինչև տարեվերջ նախատեսում են լաստանավային հաղորդակցություն սկսել Ստամբուլի և Նովոռոսիյսկի միջև։ Սակայն տրանսպորտային ընկերությունները նախընտրում են Ռազմավիրական մայրուղին , որը ավելի պարզ և կարճ երթուղի է, և Հյուսիսային Օսիան ստիպված է համակերպվել մայրուղիների երկայնքով շարված բեռնատարների «ուլունքների» հետ:
Ռազմավիրական մայրուղում ձմռանը ձյան տեղումների և լեռնանցքներում ձնահոսքի վտանգի պատճառով ավանդաբար բեռնատարների հերթեր են գոյանում։ Ռուս-վրացական սահմանի Վերին Լարսի անցակետի երկու կողմերում ծանր բեռնատարների տեղաշարժը սահմանափակվում է, մեքենաները կուտակվում են։ Մայիսինայդ հարցերը սովորաբար լուծվում են: Բայց այս տարի բնակլիմայական բարդ պայմաններ էին, բեռնատարների անցումը, ըստ Հյուսիսային Օսիայի մաքսատան, տարեսկզբից փակվել է ընդհանուր առմամբ 40 օրով, և սովորականից ավելի շատ ժամանակ է պահանջվել, որպեսզի թույլ տան բոլորին, ովքեր ցանկանում են, անցնել։ Մաքսայինները նշում են, որ ամեն ինչ անում են անցումն արագացնելու համար։ «Անցակետ են գործուղվել այլ մարզերի պաշտոնատար անձինք, իրականացվում է անդադար մաքսազերծում,- ասել են գերատեսչության մամուլի ծառայությունում, - մայիսի 26-ի ցերեկային ժամերին երկու ուղղություններով շարժվել է 2362 մեքենա, ինչը գրեթե վեց անգամ գերազանցում է անցակետի նախագծային հզորությանը, դրանցից 993-ը բեռնատարն, իսկ 1369-ը մարդատար ավտոմեքենաներ են։ Մայիսի 27-ի առավոտվա դրությամբ ընդամենը 600 միավոր բեռնատար ավտոմեքենա է մնացել հանրապետության տարածքում»։
Մաքսավորները պնդում են, որ Վերին Լարսով ապրանքների հոսքը արագ տեմպերով ավելանում է, և դա արդեն ոչ մեկ տարի, ուստի որոշվել է ընդլայնել անցակետի հնարավորությունները։ 2021 թվականի գարնանից է սկսվել վերակառուցումը։ Մինչև այս տարվա հունիսի վերջը ելքի համար պետք է բացվի ուղևորափոխադրումների 12, իսկ նոյեմբերին ՌԴ մուտքի համար ևս 12 գոտի։ Գործող կենտրոնական ուղիները սպասարկելու են միայն բեռնատարներին, որը կարագացնի սահմանային հսկողության անցումը։ Աշխատանքների ավարտից հետո երթևեկության գոտիների թիվը 15-ից կդառնա 39, կավելացվեն նաև կուտակային ավտոկայանատեղիները։ Անցակետի թողունակությունը կավելանա օրական մինչև 3800 ավտոմեքենա: Բացի այդ, Հյուսիսային Օսիայի իշխանությունները նախատեսում են էլեկտրոնային հերթագրում ներդնել երկիրից դուրս եկեղների համար։ Այն կհայտնվի 2024 թվականին Վլադիկավկազը շրջանցող ճանապարհի շինարարության ավարտից հետո, որտեղ մեքենաների համար կայանատեղիներ կստեղծվեն։
Նյութը հրապարակման պատրաստեց Կամո Խաչիկյանը
