Ակնաբույժը խոսել է COVID-19-ի պատճառով աչքերի առաջ մուգ բծերի մասին
ՀԱՍԱՐԱԿՈՒԹՅՈՒՆ
Lenta.ru-ն գրում է, որ «Ես տեսնում եմ» աչքի միկրովիրաբուժության կենտրոնի ակնաբույժ Նատալյա Կովալը Ura.ru-ին տված հարցազրույցում ասել է, որ մարդիկ, ովքեր ունեցել են COVID-19, դիմում են բժշկի գանգատներով, որ իրենց աչքերի առաջ մուգ բծեր են լինում։ Բացի այդ, որոշ դեպքերում պատկերն է աղավաղված երևում։
«Ուվեիտը՝ ուվեալ տրակտի ընդհանրացված բորբոքումը, ամենասարսափելի վիճակն է։ Ամենաբարձր վտանգը առկա է իմունային համակարգի արատ ունեցող հիվանդների մոտ: Ուվեիտի ախտանշանները հետևյալն են. բորբոքման հետևանքով ապակենման մարմնի պղտորման դեպքում տեսողության զգալիորեն վատթարացում, հիվանդները դժգոհում են պատկերի խեղաթյուրումից, ինչպես նաև սպիտակ առարկաներին նայելիս աչքերի առաջ մուգ կետերից»,- ասել է մասնագետը։
Նրա խոսքով կաթիլները կամ ներարկումները հաճախ օգնում են բուժել ուվեիտը, սակայն հնարավոր է, որ աչքը փրկելու միակ միջոցը լինի վիրահատական բուժումը։
Ավելի վաղ ակնաբույժ Վյաչեսլավ Կուրենկովը բացահայտել էր մեթոդներ, որոնք օգնում են պահպանել տեսողությունը համակարգչով երկար աշխատանքի ընթացքում։ Փորձագետը խորհուրդ է տվել կարգավորել էկրանի պայծառությունն ու տեքստի չափը։ Չափազանց հագեցած կամ, ընդհակառակը, խամրած պատկերը, ինչպես նաև չափազանց փոքր տառատեսակը հոգնեցնում է աչքերը:
Նյութը հրապարակման պատրաստեց Կամո Խաչիկյանը
