«Ես ունեմ տարակարծություն Արմեն Մարտիրոսյանի հետ». Զ.Փոստանջյանը՝ ապտակի մասին

Նախօրեին մամուլը գրել էր, որ «Ժառանգություն» կուսակցության վարչության վերջին նիստում Արմեն Մարտիրոսյանը փորձել է ապտակել Զարուհի Փոստանջյանին:

Զարուհի Փոստանջյանն այսօր, վարչության նիստից 2 օր անց, անդրադարձել է այդ թեմային՝ հայտարարելով, որ դա «ակնհայտ սուտ, վիրավորական և զրպարտչական տեղեկատվություն է»:

«Տեղեկացնում եմ, որ շուրջ 10 տարի լինելով «Ժառանգություն» կուսակցության անդամ, համատեղ կուսակցական գործունեություն եմ ծավալել արժանապատիվ կանանց և տղամարդկանց հետ: Ես ունեմ և կարող եմ ունենալ տարակարծություն Արմեն Մարտիրոսյանի հետ, սակայն նա ունի հրաշալի դաստիարակություն, որպեսզի, չկիսելով իմ կարծիքը, հարգի այն»,-հայտարարել է Փոստանջյանը:

Իր հայտարարության մեջ անդրադառնալով «Ժառանգությունը» լքած Անահիտ Բախշյանի հասցեին կուսակցության վարչության անդամ Սուսաննա Մուրադյանի հայտարարությանը, թե տիկին Բախշյանը կուսակցությունում առանցքային անդամ երբեք չի եղել, նրան հարգել են տարիքի և ամուսնուն կորցրած լինելու համար, Փոստանջյանն ասել է. «Տիկին Բախշյանը, նույնպես շուրջ 10 տարի լինելով քաղաքականության մեջ, ոչ միայն առանցքային դերակատարում է ունեցել «Ժառանգություն» կուսակցության ներսում, այլև ընդհանուր հայկական քաղաքականության մեջ` կոտրելով կարծրատիպերը և օրինակ ծառայելով երիտասարդ կանանց համար: Անկախ այն հանգամանքից, երբ այսօր որոշում կայացնելու համար մենք տարակարծիք ենք և հնարավոր է բաժանվենք, մեր համատեղ անցած քաղաքական պայքարի ճանապարհը ոչ միայն եղել է օրինակելի, այլև հենց այս հրաշալի բանաձևի մեջ` «Մեկը բոլորի համար, բոլորը` մեկի»: Ես շնորհակալ եմ ճակատագրից, որ իմ կյանքի այս անցած 10 տարիներն անցել եմ իրենց հետ»: