Հասարակության ակտիվացումը շատ կարևոր է, որպեսզի իշխանությանը թույլ չտան գնալ հայ ժողովրդի համար վտանգավոր որոշումների. քաղաքագետ
ՔԱՂԱՔԱԿԱՆՈՒԹՅՈՒՆՔաղաքագետ Երվանդ Բոզոյանի հետ զրուցել ենք Հայաստանում տիրող ներքաղաքական իրավիճակի, ընդդիմության ցույցերի և հնարավոր իշխանափոխության մասին:
«Շատ բարդ է ասել, թե ընդդիմության ցույցերը որքանով արդյունավետ կլինեն իշխանափոխության հասնելու առումով, քանի որ երեսուն տարվա մեջ նման տիպի հարցադրումներ միշտ հնչել են, բայց ամբողջական իշխանափոխության համար մի շարք հանգամանքներ են պետք: Այդ իմաստով ասել, թե ինչքանով է այս պահի դրությամբ իրավիճակն այդպիսին, ես կդժվարանամ:
Բնականաբար, ցույցերը միշտ զսպող դեր են կատարում, իրենց դերը կատարում են միշտ: Թե այս իրավիճակում ինչքանով կլուծվի խնդիրը, չենք կարող ասել, բայց ակնհայտ է, որ հասարակության ակտիվացումը շատ կարևոր է, որպեսզի իշխանությանը թույլ չտան գնալ հայ ժողովրդի համար վտանգավոր որոշումների»,- 1or.am-ի հետ զրույցում ասաց Բոզոյանը:
Անդրադառնալով Նիկոլ Փաշինյանի վերջին հայտարարություններին՝ քաղաքագետը նշեց.
«Փաշինյանը, փաստացի, առաջին գործիչն է Հայաստանի պատմության մեջ, ով նման հայտարարությամբ հանդես եկավ, որ Լեռնային Ղարաբաղի կարգավիճակը պետք է իջեցնել, փաստացի, ինքը նշեց, որ պետք է մտածել, որ Լեռնային Ղարաբաղը կարող է նաև լինել Ադրբեջանի կազմում: Նման տիպի հայտարարություն Հայաստանի ողջ պատմության մեջ չէր եղել: Հաշվի առնելով այսօրվա հասարակության ապատիան, շփոթված իրավիճակը՝ կարող եմ ասել, որ այնպիսի արձագանք, որը պետք է լիներ այս հայտարարությունից հետո, չտեսանք մենք: Այստեղ կան մի շարք օբյեկտիվ և սուբյեկտիվ պատճառներ, որոնց մասին արժի, որ մտածի մեր հասարակությունը»:
Մեր դիտարկմանը, թե պատշաճ արձագանքը կարծես նաև Արցախից է ուշանում, Բոզոյանն արձագանքեց.
«Արցախը, ըստ էության, արձագանքեց, որ մերժում է Փաշինյանի այս տարբերակը, ընդ որում՝ արձագանքը եղավ քաղաքական բոլոր շրջանակների կողմից, կարելի է ասել՝ իր ֆունկցիան կատարեց: Ինչ մնում է Հայաստանին, կարծում եմ, որ մեր հասարակությունը բոլորովին այլ իրավիճակի մեջ է, այստեղ շատ լուրջ խնդիր կա, որը քաղաքական ուժերի կողմից լուրջ աշխատանք է պահանջում»:
Մարիամ Նալբանդյան
