Համայնքապետարանը սպանդանոց կառուցելու թույտվություն է տվել, փոխարենը «օբյեկտ» է կառուցվում
ՀԱՍԱՐԱԿՈՒԹՅՈՒՆ
Այսօր մեր խմբագրությունում ահազանգ ստացանք, որ Գյուլագարակ-Ամրակից ճանապարհին համայնքը սպանդանոց կառուցելու թույլտվություն է տվել, բայց դրա փոխարեն կառուցում են «օբյեկտ»:
Գյուլագարակ համայնքի բնակիչ Արմեն Առաքելյանին շինարարության թույլտվություն տրամադրելու մասին համայնքի նախկին ղեկավար Մհեր Գևորգյանի՝ 2020 թվականի հունվարի 14-ի որոշմանը կարելի է ծանոթանալ Գյուլագարակ համայնքի պաշտոնական էջում.
1or.am-ի հետ զրույցում Գյուլագարակ խոշորացված համայնքի առաջատար մասնագետ, հողաշինարար Արեն Ֆրանգյանը, պատասխանելով սպանդանոցի փոխարեն այլ շինություն կառուցելու վերաբերյալ մեր հարցին, նշեց, որ նման ինֆորմացիայի չի տիրապետում.
«Կգնանք, կնայենք, բայց չեմ կարծում, որովհետև մենք թույլտվությունը սպանդանոցի համար ենք տվել: Հողի նշանակությունը սահմանված կարգով փոխվել է գյուղատնտեսական-արտադրականի, պետության կողմից տրամադրվող աջակցության շրջանակներում նախատեսվում է կառուցել սպանդանոցը»:
Մենք կապ հաստատեցինք նաև Արմեն Առաքելյանի հետ, ով մեզ հետ զրույցում նշեց, որ այս պահին իրենք սպանդանոց են կառուցում, բայց եթե հանկարծ սպանդանոցների օրենքը լիարժեք չգործի, կարող են փոխել շինության նշանակությունը.
«Մեր հիմնական գործը հենց սպանդանոցն է, մեկ ուրիշն էլ Վանաձորում ունենք: Այս պահին մենք սպասում ենք, սպանդանոցների մասին օրենքը բացարձակապես չի գործում, չգիտենք՝ վաղն այս երկրում սպանդանոց գործելու՞ է, թե՞ ոչ, բայց այս պահին դեռ կառուցում ենք: Մենք հույս ունենք, որ օրենքը կգործի, բայց եթե հանկարծ այդպես չլինի, մեր գործող սպանդանոցն էլ կարող ենք, օրինակ, պահեստ դարձնել»:
Թերեզա Սարուխանյան
