Վիրտուալ լաբորատորիա՝ բջջային հավելվածում. «TakeAR» թիմը դրամաշնորհի է արժանացել

«Դրամաշնորհային մրցույթին ընկերներն են խորհուրդ տվել մասնակցել, մի քանի անգամ առաջարկեցին, մենք էլ որոշեցինք մասնակցել»,- 1or.am-ի հետ զրույցում պատմում է «TakeAR» թիմի անդամներից Արեգ Ամիրաղյանը:

Ընկերների հորդորները լսելիս՝ Արեգը երևի չէր էլ պատկերացնում, որ Ամերիաբանկի կողմից հայտարարված «Դարձիˊր փոփոխությունը» ուսանողական մրցույթի գլխավոր մրցանակը՝ 3 միլիոն դրամ, բաժին է հասնելու հենց իրեն և ընկերներին` իրենց գաղափարն իրագործելու համար:

Տղաների նպատակն է Հայաստանում դպրոցական կրթական համակարգը զինել AR և VR տեխնոլոգիաներով, ստեղծել առարկաների թեմաների յուրացման հեշտ և արդյունավետ հնարավորություն.

«Ունենալով որոշակի փորձառություն այս ոլորտում՝ իրականացնելով հարցումներ ուսուցիչներից ու մասնավորապես աշակերտներից, եկել ենք այն եզրակացության, որ մասնավորապես բնագիտական առարկաների նկատմամբ տարեցտարի նկատվում է հետաքրքրվածության անկում։ Աշակերտների համար անընդմեջ ինֆորմացիայի վիզուալիզացմանը գնացող աշխարհում դասագրքերի բովանդակությունը դառնում է անհետաքրքիր, քանի որ բացակայում կամ պակասում են աշակերտին նյութը արագ, առարկայական և կիրառական մատուցման մեթոդները»,- նշում է Արեգը։

Որպես գաղափարի մեկնարկ՝ ծրագրի շրջանակներում տղաները նախատեսում են AR (augmented reality) տեխնոլոգիայի միջոցով, 9 ամսվա ընթացքում, ստեղծել դպրոցական 8-րդ դասարանի կենսաբանության՝ «մարդ-անատոմիա» դասագրքի վիրտուալ լաբորատորիա: Այն կլինի բջջային հավելված, կունենա 2-3 դպրոցում հիմնվող լաբորատորիայի արժեք, սակայն ի տարբերություն լաբորատորիաների այն կլինի անվճար հասանելի 8-րդ դասարանի բոլոր աշակերտներին, ցանկացած ժամանակ, ցանկացած տեղում ու կներառի թեմաներին հարող 3D մոդելներ, 3D անիմացիաներ, դասի կոնսպեկտ ձայնագրությունը:

Ծրագիրը հաջող իրականացնելու դեպքում թիմի անդամները նույն տեխնոլոգիան կկիրառեն նաև մյուս դասագրքերի ու մյուս առարկաների վրա` համալրելով նոր առարկաները նույն հավելվածում:

Մարիամ Նալբանդյան