Սահմանը պահելու զենքերից մեկն էլ սա է. «Տավուշ» ՀԸ-ն բացահայտում է մարզի պատանի և երիտասարդ լրագրողներին
ՀԱՍԱՐԱԿՈՒԹՅՈՒՆ
Դեռ նախորդ տարեվերջին «Տավուշ» հեռուստաընկերությունը մրցույթ էր հայտարարել՝ մարզի պատանի և երիտասարդ լրագրողներին բացահայտելու համար, ովքեր Տավուշ Մեդիայի հետ սեփական համայնքից համագործակցելու և վարձատրվելու հնարավորություն պետք է ստանային՝ դառնալով հեռուստաընկերության թղթակիցները:
«Ստացել էինք բազմաթիվ հայտեր, որոնցից հանձնաժողովի մանրամասն ուսումնասիրությունների և տվյալների մշակման արդյունքում ընտրվեցին հաղթողները: Մենք ուզում ենք հնարավորություն տալ, որ սահմանամերձ գյուղերի պատանիները մասնագիտություն ձեռք բերեն, աշխատեն, հետո արդեն փող վաստակեն իրենց աշխատանքով, բարոյական մեդիայի քուրայով անցնեն ու մնան իրենց հող ու ջրին: Ով գնում է քաղաք սովորելու, կառչում է մի ծեղից ու մնում: Ուզում ենք միջավայր ստեղծել, ստեղծագործական մշակույթ, բերրի հող, որ լրատվական դաշտը հերկվի, պտուղ տա, ծառ ու ծաղիկ: Սահմանը պահելու զենքերից մեկն էլ սա է»,- 1or.am-ի հետ զրույցում նշում է Տավուշի մարզպետի անվտանգության գծով խորհրդական, Արտակարգ ալիք տեղեկատվական ՀԿ և Տավուշ Մեդիայի խորհրդի նախագահ, գեներալ-մայոր Նիկոլայ Գրիգորյանը:
Ապրիլի 12-13-ին Իջևանում մրցույթի հաղթողների համար անցկացվեց դասընթաց, որի ավարտին հաղթողները ստացան իրենց մրցանակները՝ 4 տեսախցիկ, 4 մոնտաժային համակարգիչ և կից պարագաներ։ Այսպիսով Բերդ և Նոյեմբերյան համայնքներում կգործեն 2-ական թիմեր.
«Հրաշալի տպավորություններ ստացա, ամեն ինչ հիանալի էր, միջավայրը՝ տրամադրող: Ակնկալիքներս շատ մեծ են, նպատակ ունեմ մեծացնելու կապերս Տավուշ թիվիի հետ, և կարևորը այն է, որ իրենք տալիս են այդ հնարավորությունը: Շատ ուրախ և ոգևորված եմ, որ ապագա մասնագիտությանս մասին ունեմ արդեն բավականին շատ գիտելիք և արդեն նաև փորձ»,- նշում է մրցույթի հաղթողներից Վերա Սահակյանը:
Նոյեմբերյանի տարածաշրջանում մեկական թիմեր կգործեն Բերդավան և Կողբ բնակավայրերում: Բացի մրցութի արդյունքում ձևավորված երկու թիմերից, տեխնիկական ռեսուրսներ են տրամադրվել նաև Նոյեմբերյանի Մշակույթի կենտրոնի կողմից ձևավորված թիմին.
«Մեր թիմում փորձել ենք ընդգրկել երիտասարդների՝ համայնքի տարբեր բնակավայրերից՝ Այրումից մինչև Բաղանիս: Իրականում, մենք այս տեխնիկայի կարիքն իսկապես ունեինք: Շատ մեծ հույսեր ունեմ, որ մեր թիմի երեխաները կկարողանան լավագույն կերպով դրսևորել իրենց և ակտիվորեն լուսաբանել մեր մշակութային իրադարձությունները, որոնք սակավաթիվ չեն»,- նշեց Նոյեմբերյանի Մշակույթի կենտրոնի տնօրեն Սոնյա Զուրաբյանը:
Մարիամ Նալբանդյան
