Հայաստանից հաշիվ չուզեցին քվեարկության համար

ՄԱԿ-ի մարդու իրավունքների խորհրդում Հայաստանի՝ քվեարկությանը չմասնակցելու հանգամանքը, թերևս կարող էր դառնալ արտգործնախարարներ Արարատ Միրզոյանի և Սերգեյ Լավրովի մոսկովյան հանդիպման առանցքային թեմաներից մեկը։ Այդ մասին նախապես ակնարկել էր նույնիսկ ՌԴ ԱԳՆ պաշտոնական ներկայացուցիչ Մարիա Զախարովան։

Հիշեցնենք նախօրեին կայացած քվեարկությանը Հայաստանը չէր մասնակցել, ինչպես և մի քանի այլ երկրներ։ Փոխարենը 93 կողմ, 24 դեմ և 58 ձեռնպահ ձայներով Ռուսաստանի անդամակցությունը դադարեցրել էին ՄԱԿ-ի մարդու իրավունքների խորհրդում։

Արտգործնախարար Արարատ Միրզոյանը երեկ Մոսկվայում էր։ Ո՛չ ընդլայնված հանդիպումից կայացած մտքերի փոխանակությանը, ո՛չ էլ դրան հետևած մամուլի ասուլիսում, այդ թեմային ընդհանրապես չանդրադարձան։ Ըստ երևույթին սա կարող է վկայել ընդամենը մեկ փաստի մասին՝ Ռուսաստանն ամենևին էլ դեմ չի եղել, որ Հայաստանը չմասնակցի, թեև «Ռոյթերս » գործակալությունը նախապես նշում էր, որ Ռուսաստանի իշխանությունները բացի դեմից ցանկացած այլ քվեարկություն դիտարկելու են որպես թշնամական ակտ, Ռուսաստանի հետ սերտ հարաբերություններ պահպանող մի քանի պետություններ ընդհանրապես հրաժարվել էին, կամ նույնիսկ կողմ էին քվեարկել։

Ստեղծված պայմաններում, երբ միջազգային հանրության մի զգալի հատվածը դեմ է Ռուսաստանին, այդ երկրին պետք է նաև բուֆերային հարեւաններ, որոնք կարողանան անհրաժեշտության դեպքում ֆինանսական, տնտեսական և քաղաքական աջակցություն ցուցաբերել Ռուսաստանին, ապահովել կապը Արևմուտքի հետ։ Հայաստանը հաշվի առնելով մեր երկիր ժամանած բազմաթիվ ռուսների, գործարարների, IT-ի ոլորտի մասնագետների, իսկապես ունի այդ հնարավորությունները վերածվելու բուֆերի Արևմուտքի և Ռուսաստանի միջև։ Թերևս այս հանգամանքով է պայմանավորված, որ 4 անգամ ռուսամետ դիրքորոշում ցուցադրելու Հայաստանի քայլը, այդքան էլ ծանր չի ընկալվում ռուսների կողմից։ Անհնար կլիներ առանց այդ երկրի իշխանությունների հետ նախապես համաձայնեցնելով որևէ այլ քայլ իրականացնել և որքան էլ փորձեն հակառակը պնդել, ըստ էության Լվրովի խոսքում երեկ այդ հանգամանքի բացակայությունը ապացուցում է մեր պնդման ճշմարտացիությունը։

Կարո Ամիրյան