ՌԴ ԶՈՒ-ն գերճշգրիտ զինատեսակներով շարքից հանել են Պոլտավայի և Դնեպրի օդանավակայանները. ՌԴ ՊՆ

Ռուսաստանի Դաշնության զինված ուժերը գերճշգրիտ զինատեսակներով շարքից հանել են Պոլտավայի և Դնեպրի օդանավակայանները։

Այս մասին, ՏԱՍՍ-ի փոխանցմամբ, շաբաթ հայտարարել է ՌԴ պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը։

Նաև, Կոնաշենկովի խոսքով, ռուսական հակաօդային պաշտպանության համակարգերը Սումի քաղաքի և Ուրոժայնոյե բնակավայրի մոտ խոցել են ուկրաինական երկու Մի-24 ուղղաթիռ։ Բացի այդ, օդում ոչնչացվել է ուկրաինական 24 անօդաչու թռչող սարք։

Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին:

Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:

Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։

Ի պատասխան Արևմուտքը սահմանել է նոր հակառուսական պատժամիջոցներ: Մասնավորապես, դրա ներքո են հայտնվել մի քանի խոշորագույն բանկեր, ներառյալ «Սբերբանկ»-ը և ՎՏԲ-ն: Եվրամիությունը, ԱՄՆ-ն, Կանադան և մի շարք այլ երկրներ երկինքը փակել են Ռուսաստանի ինքնաթիռների համար: Մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունները: Պատժամիջոցներ են սահմանվել բարձրտեխնոլոգիական ապրանքներ Ռուսաստան մատակարարելու վրա: