Էլեկտրաէներգիայի շուկայի ազատականացում. ովքեր են նոր մատակարարները
ՏՆՏԵՍՈՒԹՅՈՒՆ
Էլեկտրաէներգիայի շուկայի ազատականացման գործընթացը թևակոխել է գործնական փուլ: Եթե քաղաքացին կամ տնտեսվարողը մինչև 2022թ. փետրվարի 1-ը չի ընտրել էլեկտրաէներգիայի նոր մատակարար, ապա շարունակում է էլեկտրաէներգիա ստանալ ՀԷՑ-ի միջոցով:
Հանրային ծառայությունները կարգավորող հանձնաժողովը մինչ օրս լիցենզիա է տրամադրել 6 մատակարարի և 3 թրեյդերի, որոնք էլեկրտաէներգիան արտադրողից պիտի հասցնեն սպառողին:
Ինչպես մեզ հետ զրույցում հավաստիացրեց Հանրային ծառայությունները կարգավորող հանձնաժողովի անդամ Սեդա Շահինյանը, դեռևս որևէ քաղաքացի կամ տնտեսվարող չի դարձել նոր մատակարարներից որևէ մեկի բաժանորդ:
Հիշեցնենք` մատակարարները շուկայի նոր խաղացողներն են, որոնք պիտի ավելի շահավետ առաջարկներ ներկայացնեն սպառողներին, որպեսզի վերջիններս ուզենան երաշխավորված մատակարարողից (ՀԷՑ) հրաժարվել և ընտրել իրենց:
Թրեյդերները մեծածախ առևտրով զբաղվողներն են, որոնք գործ են ունենալու միայն մեծ տնտեսվարողների հետ, ինչպես նաև` լիազորված են էլեկտրաէներգիայի միջպետական առևտուր անելու:
Եվ այսպես, 4 մատակարար ընկերություն լիցենզիա է ստացել 2021թ. դեկտեմբերին, ևս 2-ը` այս տարվա մարտին:
Երկու թրեյդերները լիցենզիա են ստացել այս տարվա փետրվարին, մեկը` դեռևս 2018-ին:
Այս հրապարակմամբ կանդրադառնանք մինչ օրս գրանցված թրեյդերներին և մատակարարներին: Լիցենզավորման գործընթացը շարունակվում է:
Ովքեր են խոշոր թրեյդերները. Կարապետյաններին փոխկապակցված ընկերությունը կկազմակերպի միջպետական առևտուրը
Ինչպես նշեցինք, թրեյդերներից երկուսը` «Արգեստ» ՓԲԸ-ն և «Էներջի սփփլայ» ՍՊԸ-ն, լիցենզիա են ստացել այս տարվա փետրվարին, մեկը` դեռևս 2018-ին: Վերջինը պետական` «ԷՆԵՐԳԱԻՄՊԷՔՍ» ՓԲԸ-ն է, որը համակարգել է միջպետական առևտուրը դեռևս մինչև ազատականացման մեկնարկը: Հանրային ծառայությունները կարգավորող հանձնաժողովի անդամ Սեդա Շահինյանն ասում է, որ պետական ընկերությունն այլևս չի գործում, նույնիսկ չունի գույք և սեփական միջոցներ: Սակայն, ազատականացման մեկնարկից հետո արդեն շուրջ մեկ ամիս է` միջպետական առևտուրը հարևան Վրաստանի հետ կազմակերպում է «Արգեստ» ՓԲԸ-ն:
«Արգեստ» ՓԲԸ-ն ստեղծվել է 2018թ. փետրվարին: Համաձայն իրական շահառուների հայտարարագրի` միակ բաժնետերը Գոռ Սուրիկի Բարոյանն է` հաշվառված Տաշիրում: Միանգամից ասենք, որ Գոռ Բարոյանը նաև «Ռիո մոլը» գործարկող «ՌԻՈ» ՓԲԸ-ի տնօրենն է, որտեղ բաժնետեր են ռուսաստանաբնակ մեծահարուստ, «Տաշիր Կապիտալ»-ի հիմնադիր Սամվել Կարապետյանն ու կինը` Էթերի Կարապետյանը: ՀԷՑ-ը, հիշեցնենք, նույնպես Կարապետյաններն են ձեռք բերել: Հետևաբար, նոր թրեյդերը Սամվել Կարապետյանին և ՀԷՑ-ին փոխկապակցված ընկերություն է:
«Էներջի սփփլայ» ՍՊԸ-ն հիմնադրվել է 2021թ. սեպտեմբերին: Միակ հիմնադիրն ու մասնակիցը 35-ամյա Արա Արտաշեսի Կիրակոսյանն է, որն ընկերությունը գրանցել է իր հաշվառման հասցեում` Բաղրամյան 1 նրբանցք, տուն 15-ում:
Ովքեր են լիցենզավորված մատակարարները
Էլեկտրաէներգիայի մատակարար է լինելու «Օպտիմում էներջի» ՍՊԸ-ն, որը ստեղծվել է 2013 թվականին: Դրա մասնակիցները երկուսն են` Արմեն Ղարիբյանը (50%) եւ Հայկ Հարությունյանը (50%): Հայկ Հարությունյանը Էներգետիկայի նախկին փոխնախարարն է` նախկին վարչապետ Կարե Կարապետյանի փեսան:
Արմեն Ղարիբյանն ու Հայկ Հարությունյանը 2018-22թթ.-ին մի շարք նոր ընկերություններ են ստեղծել, որոնք, անվանումներից դատելով, նույնպես էներգետիկայի ոլորտում են գործելու, չի բացառվում` նաև մատակարարներ դառնան: Օրինակ` 2020թ. ստեղծված «Նյու էներջի» ՓԲԸ-ի բաժնեմասում Արմեն Ղարիբյանի և Հայկ Հարությունյանի հետ մասնակցություն ունի նաև Կարեն Կարապետյանի որդին` Տիգրան Կարապետյանը: Նույն անձինք կիսում են նաև«Հելիոս էներջի» ՓԲԸ-ի բաժնեմասը:
«Էներեքս» ՓԲԸ-ն գրանցվել է 2021թ. հոկտեմբերին: Տնօրենը Գագիկ Մարգարյանն է, որը եղել է «Ժառանգություն» կուսակցության վարչության անդամ: Վերջինիս էլեկտրոնային հասցեից կարելի է ենթադրել, որ ներկայացնում է «Շտիգեն» ՍՊԸ-ն: Այս ընկերության հիմնադիրը տնտեսագետ Հայկ Շեկյանն է: Ընկերությունը զբաղվում է արևային կայանների կառուցմամբ:
Հաջորդ մատակարարը «Էներգո թրեյդ սերվիս» ՓԲԸ-ն է, որը հիմնադրվել է 2021թ. դեկտեմբերի 27-ին:
Խոշոր բաժնետերը` 75%, Ազատ Մելիքի Սաֆարյանն է, իսկ մնացյալ 25 %-ը տնօրեն Տիգրան Մեժլումյանը գրանցել է կնոջ` Ամալյա Բալաբեկյանի անվամբ:
Ազատ Սաֆարյանի գործունեությանը մասնակիորեն անդրադարձել ենք մեր հրապարակումներից մեկում, որտեղ վերջինս Շողակաթ համայնքում, իր գործընկերոջ հետ միասին, արևային կայան էր հիմնել: Շողակաթի կայանը շահագործում է «Գրին էներջի» ՍՊԸ-ն, որտեղ Ազատ Սաֆարյանը 34 % մասնակցություն ունի:
Ազատ Սաֆարյանի հայրը` Մելիք Սաֆարյանը, «Ծառուկյան» կուսակցությունների դաշինքի ռեյտինգային թեկնածուներից էր 2017թ. խորհրդարանական ընտրություններին և առաջադրել էր երկրորդ ընտրատարածքում, որը ներառում էր Արաբկիր, Աջափնյակ, Դավիթաշեն վարչական շրջանները: Իսկ համամասնական ցուցակում 50-րդ հորիզոնականն էր զբաղեցնում:
Ազատ Սաֆարյանը բաժնեմաս ունի «Պրահա» ՍՊԸ-ում, որի տնօրենը հայրն է: Հիմնադիրն ու տնօրենն է «Ս.Ա.Մ. ՀՈԹԵԼ» ՍՊԸ-ի, որը շահագործում է «Արմենիան ռոյալ պալաս» հյուրանոցը:
Ինչ վերաբերում է «Էներգո թրեյդ սերվիս» ՓԲԸ-ի մյուս բաժնետիրոջը, ապա Տիգրան Մեժլումյանը 32 % մասնակցություն ունի Բերդում գործող «Այգեձոր» և «Այգեձոր-2» hէկերը շահագործող «Ատլաս էներգո» ՍՊԸ-ի բաժնեմասում:
«Դաբլյու էս սփեշլիստ» ՍՊԸ-ն նույնպես 2022թ. լիցենզիա ստացած մատակարարներից է: Գրանցվել է լիցենզիան ստանալուց մի քանի ամիս առաջ` 2021թ. նոյեմբերին: Միակ մասնակիցը 29-ամյա Արտուշ Գուրգենի Եգորյանն է: Այս ընկերության տնօրենն էլ փաստաբան Սերգեյ Կակոսյանն է:
«Էներջի պրովայդեր» ՍՊԸ-ն գրանցվել է փետրվարի 8-ին և լիցենզիան ստացել մարտի 16-ին: Միակ հիմնադիրն ու բաժնետերը Մհեր Խաչիկի Աբազյան է` հաշվառված Տավուշի մարզի Նոյեմբերյան համայնքում:
«Էներջի սփփլայ» ՍՊԸ-ն, որը ստացել էր լիցենզիա որպես թրեյդեր, լիցենզիա է ստացել նաև որպես մատակարար:
Արդյոք լիցենզիա ստանալու համար կան սահմանված պահանջներ. ԱՄՆ ՄԶԳ շուկայի ազատականացման և էլեկտրաէներգիայի առևտրի ծրագրի ղեկավարի տեղակալ Աբգար Բուդաղյանն ասում է, որ առայժմ տվյալ կազմակերպությունները պետք է գրասենյակ ունենան, կայք և տեղեկություններ հաղորդեն: Լիցենզիա ստանալու համար այդ կազմակերպությունները պետք է բանկային երաշխիքներ ներկայացնեն Հանրային ծառայությունները կարգավորող հանձնաժողով:
«Այս պահին շուկա մուտքը շատ պարզ է, բայց առևտուրը շատ խիստ է, և դու չես կարող առևտուր անել, եթե գումար չունես: Բայց բազմաթիվ սպառողներ նայելու են, թե ով է այդ մատակարարը, ինչ-որ բան անու՞մ է, թե չի անում, և դա որոշիչ է լինելու»,-նշում է Աբգար Բուդաղյանը:
