Բայդենը կհայտարարի Ռուսաստանի դեմ նոր պատժամիջոցների մասին

ԱՄՆ նախագահ Ջո Բայդենը Բրյուսելում կայանալիք մի շարք գագաթաժողովների ընթացքում կհայտարարի ռուս քաղաքական գործիչների եւ գործարարների դեմ նոր պատժամիջոցների մասին, հաղորդում է CNN-ը։

ԱՄՆ ազգային անվտանգության հարցերով խորհրդական Ջեյք Սալիվանն ասել է, որ Բայդենը կքննարկի նաեւ իր արեւելյան թեւում ՆԱՏՕ-ի ուժերի տեղակայումը եւ Ռուսաստանի կողմից քիմիական կամ միջուկային զենքի հնարավոր կիրառման հետ կապված ծրագրերը:

Բայդենը կհանդիպի գլխավոր քարտուղար Յենս Սթոլթենբերգի հետ՝ «ստուգելու ազդանշանները»։ Սալիվանի խոսքով՝ Բայդենը ՆԱՏՕ-ի արտահերթ գագաթաժողովին կմասնակցի մոտ 3 ժամ։

Սալիվանն ասել է, որ դաշինքը «կքննարկի ՆԱՏՕ-ի ուժերի տեղակայման հարցը արեւելյան թեւում»։ Նա նշել է, որ առաջնորդները կվավերացնեն որոշ որոշումներ եւ կհանձնարարեն իրենց ռազմական եւ քաղաքական պաշտոնյաներին մշակել «գործողության երկարաժամկետ ծրագիր այն մասին, թե ինչ ուժեր եւ կարողություններ կպահանջվեն արեւելյան թեւի այդ երկրներում»:

Նա նշել է, որ G7-ի հաջորդ հանդիպման ժամանակ Բայդենը եւ իր գործընկեր առաջնորդները «կհամաձայնեցնեն պատժամիջոցների կիրառումը համակարգելու նախաձեռնությունը»։

Բայդենը վաղը կհայտարարի պատժամիջոցների փաթեթի մասին, որը կանդրադառնա ինչպես ռուս քաղաքական գործիչների, այնպես էլ օլիգարխների վրա։

Իր բոլոր քննարկումներում Բայդենը «կխորհրդակցի հնարավոր անկանխատեսելի հանգամանքների շուրջ»՝ կապված պոտենցիալ կիբեռհարձակումների կամ քիմիական ու կենսաբանական զենքի օգտագործման հետ, ինչպես նաեւ կքննարկի այն, թե ինչպես վարվել Ռուսաստանից ստացվող հռետորաբանության եւ մեկնաբանությունների հետ։