Հայաստանը կրկին «խաղից դուրս» է. Հյուսիս-Հարավ էներգետիկ միջանցքը շրջանցում է Երևանը
ՔԱՂԱՔԱԿԱՆՈՒԹՅՈՒՆ
eadaily.com-ը գրում է, որ Մոսկվայում կայացած Ռուսաստանի և Իրանի էներգետիկայի նախարարների հանդիպման գլխավոր հարցերից մեկը եղել է երկրների միջև Հյուսիս-Հարավ էներգետիկ միջանցքի ձևավորումը Ադրբեջանի տարածքով։ Իսկ Հայաստանի մասին ոչ մի խոսք, չնայած դեռ 2016 թվականին նույն Իրանը, Ռուսաստանն ու Հայաստանը միջպետական համաձայնագիր էին ստորագրել Հյուսիս-Հարավ էլեկտրաէներգետիկ միջանցքի ձևավորման մասին։ Այս ամենին ուշադրություն է հրավիրել էներգետիկ անվտանգության փորձագետ Վահե Դավթյանը։
«Այսպիսով, 2018 թվականից ի վեր Ադրբեջանի հետևողական էներգետիկ քաղաքականությունն այսօր արդեն շոշափելի արդյունքներ է տալիս։ Ավելորդ է ասել, որ Հայաստանի իշխանությունների քաղաքականությունը նույնպես բերել է նման շոշափելի (Բաքվի համար) արդյունքների և ոչ պակաս շոշափելի ռիսկեր ձևավորել մեր ազգային անվտանգության համար։ Իսկ Իրան-Հայաստան 3-րդ էլեկտրահաղորդման գծի կառուցման հետաձգումը մինչև 2024 թվականը հանրապետության ներկայիս իշխանությունների կողմից այդ դավադիր քաղաքականության ուղղակի դրսևորումներից է»,- կարծիք է հայտնել հայ փորձագետը։
Նրա խոսքով, մենք ականատես ենք Հայաստանի շարունակական դուրս մղմանը տարածաշրջանային ռազմավարական հաղորդակցության նախագծերից «հիմա արդեն շատ ավելի վտանգավոր հետևանքներով»։
Իրանը պատրաստ է միացնել երկրի էլեկտրական ցանցերը Ադրբեջանի և Ռուսաստանի էներգետիկ համակարգերին։ Այդ մասին 2021 թվականի դեկտեմբերին հայտարարել էր Իսլամական Հանրապետության էներգետիկայի նախարար Ալի-Աքբար Մեհրաբյանը Թեհրանում Ադրբեջանի դեսպան Ալի Ալիզադեի հետ հանդիպմանը։
Ինչպես ավելի վաղ նշում էին հայ փորձագետները, 2018 թվականի «թավշյա հեղափոխության» արդյունքում հանրապետությունում տեղի ունեցած իշխանափոխությունից հետո Իրան-Հայաստան երրորդ էլեկտրահաղորդման գծի կառուցման տեմպերը կտրուկ ընկել են, իսկ Հայաստան-Վրաստան էլեկտրահաղորդման գծի շինարարական նախագիծն ամբողջությամբ սառեցվել է: Այսպիսով, իրականացվում է Բաքվի երկարաժամկետ սցենարը, ըստ որի՝ Հյուսիս-Հարավ էլեկտրաէներգետիկ միջանցքը պետք է անցնի Ադրբեջանի տարածքով։
Նյութը հրապարակման պատրաստեց Կամո Խաչիկյանը
