ՌԴ ՊՆ-ն ցուցադրել է Ուկրաինայի ԶՈՒ-ի առգրավված զենքերը (տեսանյութ)
ՄԻՋԱԶԳԱՅԻՆ
Ռուսաստանի պաշտպանության նախարարությունը երկուշաբթի տեսանյութ է հրապարակել, որում ցուցադրված են ազգայնական գումարտակների և Ուկրաինայի զինված ուժերի՝ առգրավված զենքերն ու զինտեխնիկան, գրում է ՏԱՍՍ-ը։
«Ռուսաստանի օդադեսանտային ուժերի ստորաբաժանումները Կիևի արվարձանային բնակավայրից դուրս են մղել ազգային գումարտակների և Ուկրաինայի զինված ուժերի զինվորականներին, որոնք նահանջելով թողել են տանկեր, զրահափոխադրիչներ, բազմաթիվ հրետանային զինատեսակներ, հակատանկային զենքեր։ Զենք-զինամթերքը գտնվում է լավ վիճակում»,- հայտնել են նախարարությունից։
Պաշտպանության նախարարությունն ընդգծել է, որ ռուս դեսանտայինների կողմից առգրավված Ուկրաինայի զինված ուժերի տեխնիկան և սպառազինությունը կփոխանցվի ԴԺՀ-ի և ԼԺՀ-ի ժողովրդական միլիցիայի զինծառայողներին։
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին:
Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:
Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։
Ի պատասխան Արևմուտքը սահմանել է նոր հակառուսական պատժամիջոցներ: Մասնավորապես, դրա ներքո են հայտնվել մի քանի խոշորագույն բանկեր, ներառյալ «Սբերբանկ»-ը և ՎՏԲ-ն: Եվրամիությունը, ԱՄՆ-ն, Կանադան և մի շարք այլ երկրներ երկինքը փակել են Ռուսաստանի ինքնաթիռների համար: Մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունները: Պատժամիջոցներ են սահմանվել բարձրտեխնոլոգիական ապրանքներ Ռուսաստան մատակարարելու վրա:
Տեսանյութը կարող եք դիտել այստեղ:
