Ադրբեջանը շարունակում է հայաթափման քաղաքականութունը
ՎԵՐԼՈՒԾՈՒԹՅՈՒՆՆԵՐ
Արցախի կառավարությունը երեկ երեկոյան տեղեկություն է հաղորդել, թե ինչ է կատարվում գազատարի շուրջ։ Նշվում է, որ բարդ ռելիեֆի և եղանակային պայմանների պատճառով գազամատակարարման վերականգնման աշխատանքները դեռևս չեն ավարտվել։ Առաջիկա ժամանակահատվածում հանրությանը կտրամադրվեն լրացուցիչ տեղեկություններ։ Շուշի-Լիսագոր հատվածում ադրբեջանական դիվերսիայի կողմից վնասված գազատարի վերանորոգման աշխատանքները տևական բանակցություններից հետո մեկնարկել են նախօրեին։ Ընդ որում Ադրբեջանը հստակ և պարզ հասկացել էր, որ հենց ինքն է վերանորոգելու, ըստ էության, վերահսկողություն սահմանելու Հայաստանից Արցախ գազի մատակարարման խողովակների նկատմամբ։
Հարյուր հազարից ավելի բնակիչներ ձմեռային ցրտաշունչ պայմաններում ստիպված են գոյատևել գրեթե 10 օր շարունակ, ինչն ազդում է ոչ միայն մարդկանց կենսապայմանների, այլ նաև հոգեկան վիճակի վրա։ Ադրբեջանական իշխանությունները կարող են հենց այսօր, կամ առաջիկա օրերին վերանորոգել այդ գազատարը։ Խնդիրն այստեղ ամենևին այլ բանում է, թշնամի պետությունը Արցախի բնակիչներին պարզ և հստակ հասկացնում է, որ հենց ինքն է իրադրության տերը, և Հայաստանի Հանրապետության գործող իշխանությունները այլևս ոչինչ չեն կարող որոշել։
Ադրբեջանն այսօր բացառապես քարոզչական պատերազմ է իրականացնում Արցախի բնակչության դեմ։ Արցախի բնակիչներին փորձում են ներշնչել, որ իրենց գոյությունը կախված է ոչ թե Հայաստանի Հանրապետությունից կամ ռուս խաղաղապահներից, այլ ընդամենը Ադրբեջանի բարի կամքից, իսկ Ադրբեջանի բարի կամքը հայ ժողովուրդը տեսել է առնվազն 3 տասնամյակից ավելի։
Ըստ էության, երիցս ճիշտ են բոլոր այն վերլուծաբաններն ու քաղաքագետները, որոնք նշում են, թե Ադրբեջանը շարունակում է Արցախը հայաթափելու ծրագիրը, իսկ Հայաստանի գործող իշխանությունները ոչինչ չեն ձեռնարկում։ Ադրբեջանական վայրագությունների և շարունակվող հայաթափման քաղաքականության վերաբերյալ երեկ ստիպված են եղել նույնիսկ հայտարարություն անել նոր օմբուդսմեն Քրիստինե Գրիգորյանը, որը այդ պաշտոնում նշանակվել է Նիկոլ Փաշինյանի վարչակազմի կողմից։
Պատկերացրեք որքան ծանր է իրավիճակը, որ նույնիսկ Փաշինյանի իրավունքների պաշտպան հորջորջվող Քրիստինե Գրիգորյանը ստիպված է լինում նման արձանագրումներ անել: Եվ խաղաղության դարաշրջան բացելով՝ Նիկոլ Փաշինյանի այս հայտարարությունները այլևս վաղուց կորցրել են իրենց արդիականությունը և որևէ կերպ չեն կարող արդարացում ունենալ: Մինչդեռ գործող վարչախումբը չի կանգնում ոչնչի առաջ Ադրբեջանի և նրա գլխավոր դաշնակից Թուրքիայի շահերը սպասարկելու առումով։
Աշոտ Բաբայան
