ԵՄ առաջնորդները կփորձեն հասկանալ ինչպես ազատվել ռուսական էներգակիրներից

Եվրամիությունը ձգտում է, որքան հնարավոր է շուտ, վերջ դնել իր կախվածությանը ռուսական էներգակիրներից։

ԵՄ 27 առաջնորդները կհանդիպեն Վերսալում՝ հինգշաբթի մեկնարկող երկօրյա գագաթաժողովի համար, որպեսզի փորձեն հասկանալ ինչպես նվազեցնել իրենց կախվածությունը Մոսկվայից՝ հանածո վառելիքի առումով:

«Մենք պայմանավորվել ենք աստիճանաբար հրաժարվել ռուսական գազի, նավթի եւ ածխի ներմուծումից»,- ասվում է գագաթաժողովի հռչակագրի նախագծում, որին ծանոթացել է Associated Press-ը:

Միաժամանակ, Եվրահանձնաժողովը համապատասխան առաջարկներ է պատրաստում։

Հռչակագրի նախագծում ԵՄ առաջնորդները պարտավորվում են դիվերսիֆիկացնել «մատակարարումներն ու երթուղիները, այդ թվում՝ ՀԲԳ-ի (հեղուկ բնական գազի) օգտագործման եւ կենսագազի ու ջրածնի մշակման միջոցով»:

ԵՄ-ն կձգտի բարելավել անդամ երկրների միջեւ կապերը, որպեսզի, օրինակ, Իսպանիա մտնող հեղուկ բնական գազը հնարավոր լինի արագ առաքել մայրցամաքի մնացած մասեր:

Բնական գազի գինը 10 անգամ ավելի բարձր է, քան 2021թ․ սկզբին էր։ Այն շարունակում է մայրուղային գազատարներով հոսել Ռուսաստանից Եվրոպա, այդ թվում՝ Ուկրաինայի տարածքով։

ԵՄ-ն կենտրոնացած է մինչեւ հաջորդ ձմեռ դաշինքն ավելի անկախ դարձնելու վրա, ինչը կլինի առաջին հիմնական խնդիրը: Եվրոպան, որն իր գազի գրեթե 40 տոկոսը Ռուսաստանից է ստանում, այլ իրավիճակում է, քան ԱՄՆ-ը, որն իր սեփական բնական գազն է արդյունահանում։

Միջազգային էներգետիկ գործակալությունը անցյալ շաբաթ հայտարարել է, որ ռուսական գազի ներմուծումն այս տարի կարող է կրճատվել մեկ երրորդով՝ Ռուսաստանի հետ գազային գործող պայմանագրերի ժամկետը լրանալու, գործընկերներից, ինչպիսիք են Նորվեգիան եւ Ադրբեջանը, նոր մատակարարումների որոնման, պահեստավորման նվազագույն պահանջների ներմուծման եւ մնացած ատոմակայանների առավելագույն օգտագործման, մնացած գազի օգտագործումը առավելագույնի հասցնելու եւ էլեկտրաէներգիայի խոցելի սպառողներին դրամական աջակցություն առաջարկելու հաշվին։