Եթե տնօրենն է ընտրում, կոռուպցիոն ռիսկերը մեծանում են. նախարարը՝ ուսուցիչների մրցույթի մասին

Կրթության եւ գիտության նախարարությունն այժմ մտածում է՝ ինչպես լուծել մանկավարժների աշխատանքի ընդունելու մրցույթի կարգը, որի համաձայն անցումային շեմը հաղթահարած մասնագետներից մեկին ընտրում է դպրոցի տնօրենը՝ իր իսկ ցանկությամբ: Պարզվում է, որ այս տարիների ընթացքում չի մշակվել որեւէ չափորոշիչ, որով տնօրենը կկարողանար ընտրություն կատարել մասնագետների միջեւ: Ըստ երեւույթին, ամեն ինչ թողնված է ուսուցիչների խղճին:

«Անցկացվում է մրցույթ, անցնում է 3 մասնագետ. նրանցից մեկը ստացել է 100 միավոր, մյուսը՝ 80, մեկն ունի մագիստրոսի կոչում, մյուսը՝ բակալավրի: Այստեղ արդեն տնօրենն ինքն է որոշում՝ ում ընդունել: Չկա մի չափանիշ, թե ինչպես պետք է ընտրի, օրինակ, պետք է առավելություն ստանա մագիստրոսի կոչում ունեցողը, կամ առավելագույն միավոր ստացողը: Եթե տնօրենն է ընտրում, կոռուպցիոն ռիսկերն են մեծանում: Կարող է նաեւ այնպես լինել, որ անցումային շեմը հաղթահարած մասնագետներից մեկը նույն գյուղից է, մյուսը դրսից է եկել, բնականաբար առավելություն են տալիս իրենց համագյուղացուն՝ առանց հաշվի առնելու, որ օրինակ, մյուսը մագիստրոսի կոչում ունի»,- NEWS.am-ի թղթակցի հետ զրույցում ասաց Կրթության եւ գիտության նախարար Լեւոն Մկրտչյանը:

Նախարարը պատմեց, որ վերջերս իրեն մի աղջիկ էր դիմել, որն արդեն 5 տարի է՝ հաղթարահում է մրցույթի անցումային շեմը, սակայն տնօրեններից եւ ոչ մեկն իրեն աշխատանքի չի ընդունում: Տավուշի մարզից մինչեւ Երեւան. բոլոր դպրոցներում անցկացվող պատմության ուսուցչի ազատ տեղի համար անցկացվող մրցույթներին մասնակցած աղջկան ոչ մի տեղ աշխատանքի չեն ընդունել:

«Մենք պետք է կանոնակարգենք այս խնդիրը: Թե ինչ լուծում կստանա հարցը, դեռեւս չեմ կարող ասել: Բաներ կան, որոնք տեսության մեջ լավ են, հենց օրինակ տնօրենների մրցույթը, բայց երբ 7-8 տարի տեսնում ես, որ օգտակար գործողության գործակիցը խիստ ցածր է եւ մեծացնում է կոռուպցիոն ռիսկերը, ես անձնապես կողմնակից եմ, որ դա պարզեցվի կամ վերացվի»,- նշեց նախարարը:

Տնօրենների համար, ըստ Լեւոն Մկրտչյանի, իրենք արդեն ունեն չափորոշիչ՝ ինչպես բեռնաթափել բյուրոկրատական մրցույթի հետ կապված խնդիրը: Մանկավարժների համար անցկացվող մրցույթի համար նախարարությունը դեռ տարբերակներ է մտածում. «Կամ պետք է կանոնակարգել կարգերով, որ տնօրենին ազատություն չտրվի, որ ինքը չորոշի, թե ում աշխատանքի ընդունել, կամ վերացնել մրցույթի հասկացությունը: Մրցույթը լավ բան է առհասարակ, բայց եթե բացի ռիսկերից, որիշ ոչինչ չի ավելացնում, ուրեմն ավելի լավ է վերացնել, այդ վտանգից զերծ պահել: Երբեմն երբ ուզում ես լավ բան անել, հասարակությունը պատրաստ չի լինում եւ ստացվում է այլ պատկեր: Օգոստոսյան մեր խորհրդակցությունների ժամանակ մենք պետք է դեռ քննարկենք այս հարցը»: