Հայ-թուրքական բանակցությունների մանրամասները թաքցնում են

Հայաստանի գործող իշխանությունները շարունակում են հանրությունից թաքցնել հայ-թուրքական հարաբերությունների կարգավորման բանակցությունների մանրամասները։ Արատավոր այս վարքաբանությունն արդեն սովորական է դարձել արտաքին քաղաքականության բոլոր պատասխանատուների կողմից։ Երեկ էլ, Ազգային ժողովում ԱԳ նախարար Արարատ Միրզոյանը երկար ճոռոմաբանել է հայ-թուրքական բանակցությունների վերաբերյալ՝ բովանդակային որևէ հայտարարություն չանելով։ Միրզոյանը դրական է գնահատել Հայաստանի և Թուրքիայի ներկայացուցիչների երկրորդ հանդիպումը, որ օրեր առաջ կայացել էր Վիեննայում։

«Կողմերը վերահաստատել են, որ գործընթացը տեղի է ունենում առանց նախապայմանների, և որ գործընթացի վերջնարդյունքը հարաբերությունների կարգավորումն է, մեզ համար նաև՝ Հայաստան-Թուրքիա սահմանի բացումը: Շատ ավելի կոնկրետ է եղել քննարկումը, քան ենթադրաբար կարող էր լինել առաջինը: Միևնույն ժամանակ, բոլորս հասկանում ենք, որ շատ շոշափելի արդյունքներ դժվար է ակնկալել երկրորդ հանդիպման համար: Երկրորդ հանդիպումն էր մի գործընթացի, որը պիտի լուծումներ տա հարյուրամյակների խնդիրներին»,- ասել է Միրզոյանը:

Այդուհանդերձ, Հայաստանը դեռ չի որոշել Անթալիայում կայանալիք դիվանագիտական ֆորումին Հայաստանի մասնակցության հարցը։ Վիեննայի հանդիպումից առաջ նշվում էր, թե այն էական նշանակություն կունենա՝ որոշելու մասնակցո՞ւմ են ֆորումին, թե՞ ոչ։

«Հուսով եմ՝ կհամաձայնեք, որ աշխարհում սրընթաց կերպով են իրադարձությունները զարգանում և փոփոխվում: Ըստ էության, նույնիսկ նախկինում կարճաժամկետ թվացող իրադարձությունները և ժամկետներն այժմ բավականին երկար են»,- ասել է Միրզոյանն ու հավելել, թե մասնակցության վերաբերյալ որոշում կկայացվի, երբ ֆորումի ժամկետները մոտ լինեն: Թերևս, Միրզոյանի խոսքերից կարելի է եզրակացնել, որ Հայաստանի իշխանությունները ձգտում են խուսափել դրա մասնակցությունից, և այժմ պատրվակներ են փնտրում Անթալիա չգնալու համար։

Լևոն Թադևոսյան