Փաշինյանի վարչախումբն ու «Շուշիի հռչակագիրը»
ՎԵՐԼՈՒԾՈՒԹՅՈՒՆՆԵՐ
Հայաստանի գործող իշխանությունները երեկ ձախողել են ընդդիմադիր «Հայաստան» խմբակցության նախաձեռնությունը, որով առաջարկվում է Ազգային ժողովում դատապարտել թուրք-ադրբեջանական հռչակագիրը՝ ընդունված անցած տարի Շուշիում։ Ակնհայտ հակահայկական բովանդակությամբ հռչակագիրը դարձել է փաշինյանական վարչախմբի աչքի փուշը։ Սակայն ամեն գնով իշխող խմբակցությունը փորձում է ընդդիմանալ դրա դատապարտման որևէ հնարավորության։ Ընդդիմությունը այդ կապակցությամբ օրեր առաջ նախաձեռնել էր արտահերթ նիստ, սակայն Փաշինյանի կուսակիցները հրաժարվել էին ներկայանալ։ Երեկ էլ ԱԺ-ում քննարկումների ժամանակ ընդդիմությունը հարցը ներկայացրեց հերթական նստաշրջանում, իսկ «Հայաստան» խմբակցության ղեկավար Սեյրան Օհանյանը հայտարարեց, որ եթե իշխանությունը հրաժարվի քննարկման դնել այս նախագիծը, ապա կստացվի սպասարկել թշնամու շահերը։
Ազգային ժողովի փոխնախագահներ Ռուբինյանն ու Արշակյանը, ի դեպ, սկսեցին բղավել, բուռն վիճաբանության մեջ մտան ընդդիմադիրների հետ, իրենց սովորական մարտավարության շրջանակներում սկսեցին մեղադրել ընդդիմությանը՝ թշնամու շահերը սպասարկելու մեջ։ Իսկ արդեն ընդմիջումից հետո, երբ հարցը դրվեց քվեարկության կողմ քվեարկեցին միայն 28 պատգամավորներ, բոլորն էլ ընդդիմությունից։ Իշխանությունից ներկա պատգամավորներից մեկը քվեարկեց դեմ, 57-ը՝ ձեռնպահ։ Ըստ էության, գործող իշխանությունները հրաշալի հասկանում են, որ վաղ թե ուշ ստիպված են լինելու անդրադառնալ այդ հայտարարությանը։ Իսկ նման դեպքերում տակտիկան հետևյալն է. քվեարկել ոչ թե դեմ, այլ ձեռնպահ։ Միևնույն է ընդդիմության հայամետ նախաձեռնությունն այդ դեպքում ձախողվելու է։ Իսկ փաշինյանական իշխանությունը իր դրսի տերերին կկարողանա ապացուցել, որ ամեն գնով ձախողել է այս կամ այլ ցանկացած նախաձեռնություն։
Ըստ էության, քարոզչական տեսակետից էլ դա Նիկոլ Փաշինյանին առավելություն է տալիս ժողովրդին համոզելու, որ իբր իրենք դեմ չեն քվեարկել։ Այս դեպքում որևէ տարբերություն չկա, դեմ կքվեարկեին, ձեռնպահ կքվեարկեին կամ ընդհանրապես չէին քվեարկի։ Փաստն այն է, որ Հայաստանի գործող իշխանությունները, «Քաղաքացիական պայմանագիր» խմբակցությունը ամեն գնով ձախողում են ընդդիմության ցանկացած նախաձեռնություն, որը վերաբերում է Արցախի հարցի կամ Հայաստանի անվտանգային խնդիրներին։
Հարություն Սերոբյան
