ՌԴ-ն և Ուկրաինան գերիների փոխանակում են իրականացրել

Ուկրաինայի Սումիի մարզում ռուսական տեխնիկայի համար կանաչ միջանցք է ստեղծվել։ Այս մասին հայտարարել է Սումիի մարզային պետական վարչակազմի ղեկավար Դմիտրի Ժիվիցկին, գրում է korrespondent.net-ը։

Նրա խոսքով՝ ռուսական մեքենաների շարասյունը Օսոևկայից ուղևորվում էր Կրասնոպոլ։ Կանաչ միջանցք ստեղծելու որոշումը կայացրել է Ուկրաինայի նախագահ Վլադիմիր Զելենսկին:

«Կանաչ միջանցք Օսոևկայից եկող թշնամու տեխնիկայի համար։ Այնտեղ պատանդներ են՝ մեր գերիները։ Շարասյունն ուղևորվում է գերիներին փոխանակելու։ Կանաչ միջանցքը կազմակերպվել է Ուկրաինայի նախագահի հրամանով», - ասել է Ժիվիցկին։

Նշվում է, որ ռուսական գերությունից վերադարձել են տարածքային պաշտպանության հինգ մարտիկ։ Նրանք փոխանակվել են ռուս սպայի հետ։

Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին։ 

Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»։

Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։