Դատարանը ձգձգում է Դավիթ Տոնոյանի և «Պատրոն Դավիթի» գործի քննությունը

Հայաստանի պաշտպանության նախկին նախարար Դավիթ Տոնոյանի, «Պատրոն Դավո» մականունով զենքի մատակարար Դավիթ Գալստյանի, գլխավոր շտաբի պետի նախկին տեղակալ Ստեփան Գալստյանի և  մյուսների գործով դատաքննությունը, Երևանի ընդհանուր իրավասության դատարանում երեկ հետաձգվել է։ Պատճառը գլխավոր շտաբի նախկին տեղակալ Ստեփան Գալստյանի վիրահատությունն է, թեև հստակ է, որ դատական մարմինները վերջին շրջանում փորձում են հետաձգել այս քրեական գործի քննությունը։ Ավելի վաղ հետաձգվել է նույն գործով անցնող պաշտպանության նախկին նախարար Դավիթ Տոնոյանի և մյուսների կալանքի դեմ վերաքննիչ դատարան մակագրված բողոքի քննությունը։ Դավիթ Գալստյանն ու Դավիթ Տոնոյանը, ինչպես նաև մյուսները մեղադրվում են այսպես կոչված «անպիտան հրթիռների» գործով իբր մեծ քանակությամբ ժամկետանց հրթիռներ Հայաստանի պաշտպանության նախարարությանը վաճառելու և 4,7 միլիոն դոլարի խոշոր վնաս հասցնելու մեջ։

Պաշտպանական կողմը բազմիցս հայտարարել է, թե այս գործը շինծու է և պահանջել են փորձաքննություն իրականացնել հրթիռների վերաբերյալ։ Ո՛չ նախաքննական մարմինը, ո՛չ դատախազությունը չէին համաձայնվել փորձաքննություն անցկացնել, ինչը լրացուցիչ կասկածներ է հարուցում նրանց գործողությունների նկատմամբ։ Փաստ է, որ արցախյան 44-օրյա պատերազմից հետո Նիկոլ Փաշինյանի իշխանությունը ցանկանում է ամեն գնով քավության նոխազներ գտնել և նրանց վրա բարդել պատերազմի ամբողջ մեղքը՝ այսկերպ մաքրելով փաշինյանական իշխանությանը։ 

Այդ նույն գործերով է լծված նաև Ազգային ժողովում ստեղծված քննիչ հանձնաժողովը։ Եվ Դավիթ Տոնոյանի փաստաբանները բազմիցս նշել են, որ դատարանում գործի դատաքննությունը պետք է անց կացնել ոչ թե դռնփակ, այլ դռնբաց դատական նիստում, որպեսզի հանրության համար պարզ լինի, որ իրենք մեղավոր չեն։ Դատավորը այդ հարցի վերաբերյալ ցանկացած միջնորդություն մերժել է։ Դավիթ Տոնոյանի փաստաբաններն էլ խորը կասկածներ ունեն, որ դատական համակարգիչները առգրավելուց հետո գործերի ձեռքով մակագրումը հատուկ է իրականացրել, որպեսզի գործը քննի այնպիսի դատավոր, որը չի հակաճառի իշխանության քմահաճույքներին։ Նրանք նաև դատավորին ինքնաբացարկի միջնորդություն են ներկայացրել, որի քննությունը սակայն հնարավորինս հետաձգվում է։ Ըստ էության, թե՛ Դավիթ Գալստյանը, թե՛ Դավիթ Տոնոյանն ու մյուսները հանիրավի ամիսներ շարունակ պահվում են կալանքի տակ և ռեալ դատական քննություն այդպես էլ չի իրականացվում։

Տիգրան Պողոսյան