Ռուսաստանի տնտեսությունն արդեն որոշակի իմունիտետ ունի նման պատժամիջոցների նկատմամբ
ՔԱՂԱՔԱԿԱՆՈՒԹՅՈՒՆ
Արևմտյան երկրների կողմից Ռուսաստանի դեմ ֆինանսական և տնտեսական պատժամիջոցներ են կիրառվել։
Այս մասին զրուցել ենք տնտեսագետ Կարեն Սարգսյանի հետ։
Հարցին, թե կիրառվող ֆինանսական և տնտեսական պատժամիջոցները ի՞նչ ազդեցություններ են ունենալու Ռուսաստանի Դաշնության վրա` տնտեսագետն ասաց. «Պետք է նկատի ունենալ, որ այդ պատժամիջոցների մի մասը նախկինում կիրառվել է, ուղղակի հիմա ավելի ընդլայնված սպեկտրով է, այս պարագայում Ռուսաստանի տնտեսությունն արդեն որոշակի իմունիտետ ունի նման պատժամիջոցների նկատմամբ։ Միևնույն ժամանակ պետք է նշել, որ Ռուսաստանը, ի տարբերություն այլ պետությունների, էներգետիկ, պարենային ու հումքային անկախության մեծ աստիճան ունի, և պատժամիջոցների ազդեցությունը թե՛ տնտեսության, թե՛ բնակչության կենսամակարդակի վրա այդքան շատ չի զգացվի։ Իհարկե, պատժամիջոցներն ունենալու են իրենց բացասական հետևանքները, սակայն Ռուսաստանի տնտեսությունը չի ցնցվելու կամ ճգնաժամային իրավիճակ չի ստեղծվելու։ Սկսած անցած տարվա կեսերից կա նավթի գների բավական բարձր դինամիկա, իսկ Ռուսաստանը նավթի խոշոր արտահանողներից է, և այս գործոնի դրական ազդեցության շնորհիվ Ռուսաստանն ունի նաև մեծ աջակցություն արտարժութային մուտքեր ապահովելու, և ցանկացած պահի, եթե ռուբլու խիստ անկում սպառնա, ռուսական բանկը, ինչպես երեկ կատարվեց, արժութային ինտերվենցիաների միջոցով դոլարային այդ մեծ զանգվածը կարող է ներարկել շուկա ու բավարարել բանկերի իրացվելիությունը և խուճապային այդ տրամադրությունները զսպել»։
Սոնա Գիշյան
