Վիեննայում կհանդիպեն Քըլըչն ու Ռուբինյանը․ նոր զարգացումներ հայ-թուրքական հարաբերություններում
ՎԵՐԼՈՒԾՈՒԹՅՈՒՆՆԵՐ
Ավստրիայի մայրաքաղաք Վիեննայում այսօր կայանալու է հայ-թուրքական հարաբերությունների կարգավորման բանագնացների երկրորդ հանդիպումը։ Այն կայանում է աշխարհաքաղաքական չափազանց կարևոր և վտանգավոր զարգացումների, ռուս-ուկրաինական հակամարտության ֆոնին, ինչը լրացուցիչ լարվածություն կարող է առաջացնել բանակցություններում։ Թուրքիայի նախագահ Ռեջեփ Թայիփ Էրդողանը բանակցություններից ժամեր առաջ հայտարարել է՝ Անկարան կարող է բացել սահմանները և վերականգնել դիվանագիտական հարաբերությունները, եթե Երևանը հավատարիմ մնա գործընթացը շարունակելու գաղափարին։
«Եթե Հայաստանը հավատարիմ մնա բանագնացների մակարդակով նախաձեռնված գործընթացը շարունակելու գաղափարին, մեզ համար այլևս չեն կարող փակ սահմաններ լինել: Մարդկային շփումների ամրապնդման համար որոշեցինք վերականգնել երկրների միջև ուղիղ չվերթները: Այս ամսվա սկզբին մեկնարկեցին Ստամբուլ-Երևան կանոնավոր թռիչքները», - նշել է Թուրքիայի նախագահը։
Էրդողանի խոսքով՝ տարածաշրջանը խաղաղության, կայունության և բարգավաճման կարիք ունի և այդ գիտակցումով իրենք անկեղծ ջանքերով Հայաստանի հետ կարգավորման գործընթաց են սկսել: Թուրքիայի նախագահը նաև հիշեցրել է, որ Ադրբեջանի նախագահ Իլհամ Ալիևը ևս կողմ է այս քայլերին:
«Անկարան գոհ է, որ Հայաստանը հարաբերությունների կարգավորման համար կամք է ցուցաբերում և ակնկալում ենք, որ հայկական կողմը կշարունակի իր դրական մոտեցումը», - ընդգծել է նա։
Թուրքիայի ներկայացուցիչ Սերդար Քըլըչն էլ Վիեննա մեկնելուց առաջ այցելել է Պոլսո Հայոց պատրիարք Սահակ արքեպիսկոպոս Մաշալյանին, հույս հայտնել, որ հարաբերությունների կարգավորման ճանապարհին երկու երկրների համար էլ դրական զարգացումների հող պիտի նախապատրաստվի՝ երկկողմանի ստանձնած առողջ քայլերով։ Հայկական կողմը շարունակում է պնդել, թե որևէ նախապայման չկա բանակցություններում, ինչը, սակայն համոզիչ չէ ո՛չ ընդդիմության, ո՛չ էլ հայ հանրության համար։ Այսօրվա բանակցություններից է կախված՝ արդյո՞ք արտգործնախարար Արարատ Միրզոյանը և Հայաստանի հատուկ ներկայացուցիչ Ռուբեն Ռուբինյանը կմասնակցեն մարտի 11-ից 13-ը թուրքական Անթալիայում անցկացվելիք դիվանագիտական ֆորումին, թե՞ ոչ։ Ռուս-ադրբեջանական դաշնակցային հռչակագրի ստորագրումից հետո պաշտոնական Երևանի դիրքերն էլ ավելի են թուլացել տարածաշրջանում, և Հայաստանը հայտնվել է բարդագույն խնդրի առջև։ Սպասենք նոր ու վտանգավոր զարգացումների։
Մանվել Մնացականյան
