Նոր հակասություններ պետական կառույցների միջև․ դատական համակարգի աղավաղումը շարունակվում է

Հայաստանի արդարադատության նախարարության և Բարձրագույն դատական խորհրդի միջև նոր առճակատում է հասունանում, որը կարող է հանգեցնել կա՛մ Կարեն Անդրեասյանի, կա՛մ Գագիկ Ջհանգիրյանի պաշտոնանկությանը։ Կարեն Անդրեասյանն արդեն բացահայտ մեղադրանքներ է հղում Ջհանգիրյանին ու նրա գլխավորած կառույցին՝ Նիկոլ Փաշինյանի մտադրությունները վիժեցնելու, անկախ դատավորներին չպատժելու մեջ։ Նախօրեին «Ազատություն» ռադիոկայանի եթերում Անդրեասյանը հայտարարել է, թե Հայաստանում, կոպիտ հաշվարկներով, 40 կոռումպացված դատավոր կա, որոնց մի մասը սկսել են ինքնաբացահայտվել՝ որոշակի քաղաքական ակցիաներով, ակտիվությամբ, մեկը մյուսին պաշտպանելով։

«Ինչ-որ կլանային զգացողություններ կան։ Օրինակ՝ 93 դատավոր ստորագրում է ինչ-որ հայտարարության տակ։ Ես հո չեմ ասում՝ 93-ն էլ կոռումպացված են, բայց տեսնում ենք, որ էնտեղ մի 10, 20, 30 անուն կրկնվում է, հետո լինում է մի ուրիշ ակցիա, որտեղ տեսնում ենք, որ 4, 5-ն էն 30-ից հայտնվել են», - ասել է նախարարը։

2018-ի հեղափոխությունից գրեթե մեկ տարի անց Հայաստանի վարչապետ Նիկոլ Փաշինյանը կառավարությունում հրավիրած խորհրդակցությունում հայտարարեց, որ եկել է դատական համակարգում վիրահատական միջամտություններ իրականացնելու ժամանակը։ Ըստ նրա՝ առաջինը՝ Հայաստանում գործող բոլոր դատավորները պետք է ենթարկվեն այսպես կոչված վեթինգի: Միջազգային իրավական փորձում վեթինգը ենթադրում է անձի կենսագրության ուսումնասիրություն։ Անցումային արդարադատության շրջանում վեթինգի միջոցով ստուգվում են դատավորների ու այլ պաշտոնյաների գործունեությունը։ Դատական համակարգը զտելու, վեթինգի մասին հաճախ է խոսում վեց ամիս առաջ նախարար նշանակված Անդրեասյանը՝ նշանակման առաջին օրերից հայտարարելով՝ վեթինգը սկսվել է։ Այսօր էլ իր ձախողումներն արդարացնելու համար փորձում է մեղքը բարդել Ջհանգիրյանի վրա։

«Ես էսօր գործիք ունեմ, էդ գործիքն արդար ձևով աշխատացնելու շանս կա։ Ես տարա ԲԴԽ, այստեղ մեզ մնում է վերջին շանսը՝ ԲԴԽ-ն լավը լինի, եթե Բարձրագույն դատական խորհուրդը լինի իր բարձունքի վրա, ապա ես ձեզ խոստանում եմ, մեկ տարվա ընթացքում վեթինգը Հայաստանում կվերջանա և կլինի էնպիսի դատական համակարգ, ինչպիսին դուք ուզում եք», -ասել է Անդրեասյանը միևնույն ժամանակ արձանագրելով՝ ԲԴԽ-ն միշտ չէ, որ իր բարձունքում է։

Բանն այն է, որ օրեր առաջ ԲԴԽ-ն արդարացրեց դատավոր Զարուհի Նախշքարյանին, հընթացս էլ հաճախ են մերժում արդարադատության նախարարության հարուցած վարույթները։ Եվ Անդրեասյանի ու Ջհանգիրյանի առճակատումը հասել է «դիվանբաշուն»։ Մեր աղբյուրի փոխանցմամբ, Անդրեասյանը պահանջել է կա՛մ Ջհանգիրյանը բավարարում է իր բոլոր վարույթները, կա՛մ իրենցից մեկնումեկը պետք է լքի պետական աշխատանքը։

Գարիկ Այվազյան